Vil greia ut omsorgstilskot til foreldre

Fleirtalspartia gjev kommunedirektøren i oppgåve å greia ut eit kommunalt omsorgstilskot til foreldre med omsorg for barn mellom 13 og 19 månadar. Føresetnaden er at barnet ikkje har full barnehageplass.

Det var Inger-Elin Nesheim frå KrF som presenterte dette verbalpunktet då budsjett og økonomiplan vart vedteke i Kommunestyret på torsdag.

– Målet er å leggja til rette for ein god, trygg og meir individuell tilpassa overgang frå heimen til barnehagekvardagen. Dette kan vera ein tøff overgang for både barn og foreldre, og ein del foreldre ynskjer at barnet startar i barnehagen når det er over 12 månader, for eksempel 15 månader eller 20 månader eller 2 år. Mange vel ulønna permisjon og ferie for å få lenger permisjon og skyva barnehagestarten litt, sa ho.

Nesheim understreka at familiar er ulike og folk lever liva på ulikt vis. KrF, Venstre, Ap og Høgre ynskjer no å visa at dei set pris på omsorga som familien gjev sine yngste barn, og difor gje meir reell valfridom ved barnehagestart.

80 barn i året

Konkret ber dei kommunedirektøren greia ut ei ny ordning med eit kommunalt omsorgstilskot som kan gjevast til barn i alderen 13 til 19 månader som ikkje disponerer fulltidsplass i barnehagen. Ved deltidsplass kan ein få gradert omsorgstilskot og tilskot for maksimalt sju månader.

– Dette vil koma på toppen av nasjonal kontantstøtte som er 7500 kroner i månaden skattefritt. Det er per i dag 650 barn i barnehagealder, og av desse har 21 deltidsplass. Det vert fødd cirka 80 barn i året her i Kvinnherad, så det vil til ei kvar tid vera maksimalt dette talet som kvalifiserer til omsorgstilskotet. Det vil, med andre ord, bety mykje for dei som får nytta tilskotet, utan at det vil kosta kommunen alt for mykje, fortalde Inger-Elin Nesheim.

Ho vonar tilskotet også kan letta på presset i barnehagesektoren. Politikarane har nemleg fått melding om at barnetalet ikkje ser ut for å gå ned nett no.

Letta på trykket

– Barnehagane er per no rimeleg fulle og det er vanskeleg å skaffa kvalifisert bemanning, og faktisk bemanning generelt. Kanskje kan omsorgstilskotet vera med og letta på noko av trykket i sektoren, for dei yngste barna er mest ressurskrevjande, avslutta Nesheim.

Utgreiinga skal leggjast fram som sak innan september 2025. Den skal mellom anna innehalda ein oversikt over liknande omsorgstilskot i andre kommunar med erfaringar frå desse. Ein skal også sjå på økonomisk konsekvens ved månadleg utbetaling av eit tilskot på 3000, 5000 og 7000 kroner.