Vil framskunda nytt bufellesskap på Husnes

Dette varslar leiar for helse- og omsorgssektoren i kommunen, Åslaug Brænde.

– Brukarane innanfor vår sektor har blitt ei mykje meir mangfaldig gruppe enn før. Eldrebølga har vore snakka om lenge, men no ser me at det er dei yngre som krev flest ressursar, og me er bekymra for økonomien i sektoren vår dersom me ikkje får samla tenestene i eit bufellesskap så snart som råd, seier ho.

Frå oppvekst til pleie- og omsorg

Det var på budsjettkonferansen måndag at sektorleiar Brænde påpeika dette for ei samla kommuneleiing og formannskap. Etter konferansen fekk Grenda ein prat med Brænde.

Born og unge som har behov for tilrettelegging og hjelp, får det gjennom oppvekstsektoren. Når dei fyller 18 år, er det pleie- og omsorgssektoren som tar over ansvaret for at dei får den hjelpa og oppfølginga dei skal ha. Dette kan vera personar med nedsett funksjonsevne, eller psykisk sjukdom.

– Mellom 15 og 20 unge som treng ulike former for tilrettelegging, kjem til å fylla 18 år i løpet av dei neste 10-15 åra. Difor treng me å få på plass eit bufellesskap i Husnes-området. Eit slikt bufellesskap ligg alt i planane våre, men no ynskjer me å få prosjektet framskunda, seier Brænde.

– Har dei ikkje rett til å bu kor dei vil, då?

– Jo, alle innbyggjarar kan bu kor dei vil i kommunen. Me trur at eit slikt bufellesskap vil vera populært. Dei som har fått plass på Heradstun har venta lenge på at det skal bli bygt ferdig så dei kan flytta inn. Eg trur eg kunne ha fått interesserte bebuarar til eit tilsvarande tilbod på Husnes alt i dag, meiner sektorleiaren.

Meir individualiserte tenester

For Pleie- og omsorg er det svært viktig å få samla personar med behov for tenester. Det handlar mellom anna om økonomi, sidan det vil krevja langt fleire ressursar å hjelpa folk som bur på kvar sin plass spreidd rundt i kommunen. Men det handlar også om kvaliteten på tenestene som vert tilbydd.

– Me treng å samlokalisera tenestene for å samla kompetansen på éin stad, og få eit styrka og robust arbeidsfellesskap for dei tilsette. Dette vil gje eit godt tilbod til brukaren, meiner Åslaug Brænde.

Brænde påpeiker vidare at yngre brukarar innanfor pleie og omsorg krev meir individualiserte tenester enn dei eldre.

– Dei yngre vil gjerne vera meir aktive, kanskje med arbeidstiltak, fritidsaktivitetar og anna som gjev dei ein meiningsfull kvardag. Dette krev fleire ressursar frå vår side, men me skal passa på at dei ulike gruppene får den hjelpa dei skal ha, seier sektorleiaren.

Finn løysingar saman

Kommunedirektør Leif Ove Mikkelsen skal leggja fram sitt budsjettforslag 29. oktober, og held førebels korta tett til brystet om midlar til ein oppstart for bufellesskapet alt er sett inn i budsjettet for 2025.

– Eg kan ikkje seia noko om det før budsjettforslaget er ferdig, for det er under arbeid no, seier han på telefon.

Dersom midlar er teke med i denne omgang, kjem framdrifta an på politikarane si budsjetthandsaming, samt kor mange meiningar som skal brytast om storleik og plassering, før ei bygging kjem i gang.

Åslaug Brænde ser uansett ljost på det:

– Eg peiker på utfordringar, men me ser også moglegheiter, og skal finna dei gode løysingane saman, avsluttar ho.