Vil fortelja historia om dama i Grytevikjo

– Eg har ikkje fått så veldig mange tips. Det var noko respons frå folk men ingenting som førte til noko vidare, fortel ho.

Samstundes med jakta på historiar jobba Merethe med eit prosjekt om forlatne hus. Då ho gjorde undersøkingar i Kvinnherad til dette kom ho over eit hus i Dimmelsvik som ho tykte var interessant.

– Det er eit hus rett ved sandtaket. Det er ikkje straum og innlagt vatn, og huset ser ut til å vere frå 1700-talet. Det er relativt falleferdig no, halve delen er allereie borte, fortel ho.

Dette huset har altså blitt inspirasjon for episoden ho skal laga for Altibox. Kva som fengsla ho ved huset, er dama som budde der i mange år. Oline Sandvik budde her aleine i fleire år før ho døydde på 50-talet. Ho hadde ingen familie og var veldig fattig.

– Det som fascinerte meg mest var ei historie eg blei fortald om ho. Ein gong hadde ho eit sår på kinnet, og då ho blei spurt om dette sa ho at ho hadde problem med eit hol i veggen under senga. Her kom det inn rotter og mus, og ho hadde rett og slett blitt biten av ei rotta. Dette fortel jo litt om kva situasjon ho var i og forholda ho levde under, seier Merethe.

Jaktar etter Kvinnherad-historier frå kanten

Eit enkelt liv

Merethe vart veldig nyfiken på Oline, og har bestemt seg for at det er ho og livet hennar i huset i Grytevikjo episoden skal handle om.

– Filmen vil nok bli ein slags gradvis avdekking av livet hennar. Kanskje det i starten er mykje myter eller historier som har gått om ho på bygda, men målet mitt er å avdekka korleis livet hennar faktisk var. Difor er eg ganske avhengig av at folk kan fortelja meg om ho. Summen av bidrag kan kanskje gjera at ein kan danna seg eit litt betre bilete av denne dama, seier Merethe.

Om det i det heile tatt er mogleg å finna noko informasjon om ho eller om det i det heile tatt er nokon som hugsar ho blir ein del av filmen.

– Dette er ei dame som absolutt ikkje har skreve seg inn i historiebøkene, det var omtrent ingenting oppsiktsvekkande med ho. Difor tykkjer eg det er ekstra viktig å fortelja hennar historie. Det at ho budde aleine i det gamle huset gjorde nok inntrykk på folk på den tida òg. Det var visst mange som hjelpte ho, dei kom med mat til ho og gav ho skyss når ho trengde det, seier Merethe.

Via livet til Oline vonar Merethe at ho òg kan visa litt om korleis det var på den tida. Å bu i eit hus utan straum og vatten var nok ganske unikt, sjølv då.

– Det fortel jo ein del om korleis folk har levd i Kvinnherad i mange år, noko eg tykkjer er veldig spennande. Men resten av livet til Oline kan òg sei oss noko om korleis det var på den tida. I huset hennar var det ei seng og ein stol, ho var liksom ikkje med på den materialistiske utviklinga. Korleis var det å vera fattig? Kva skjedde med dei fattige på den tida, og korleis fungerte eigentleg fattigkassa?, undrar Merethe seg.

Odelsgut og fantefølge: Vann Gullruten for beste klipp dokumentar

Nøsta opp eit heilt liv

Merethe er ganske fersk i lokalhistorie-gamet, men har allereie leita i kyrkjebøker og folketeljingar. Men kva ein kan stola på kan vera vanskeleg å veta i gamle dokumenter, då ein til dømes ikkje veit dei heilt rette tidspunkta eller namn kanskje har blitt stava litt forskjellig frå dokument til dokument.

– Eg føler meg litt som ein detektiv, ler Merethe, og legg til;

– Dersom nokon har nokre tips til korleis ein kan navigera desse arkiva, eller til andre plassar ein bør leita etter innhald, tek eg gjerne imot, seier ho.

Med seg på teamet har Merethe ein filmfotograf ho gjekk på skule med i Lofoten. Han kjem neste veke og dei skal då starte på innspelinga. Ho har vore i kontakt med eit par stykke som hugsar Oline, men vil svært gjerne koma i kontakt med fleire.

– Eg må på eit vis nøsta opp i livet hennar, og då er eg avhengig av at folk kan fortelja meg om ho, avsluttar Merethe.