Vil droppa eigedomsskatt på næring i 4. kvartal - og i 2023

Nyhenda vart offentleggjort av ordførar Hilde Enstad (Ap) og varaordførar Leif Sverre Enes (H) i forkant av møtet med kommunalministeren i dag, onsdag.

Fritaket vil koma opp som sak i kommunestyret på torsdag, og dei to partia satsar på at dette fritaket blir vidareført i 2023.

– Det blir i så fall ein budsjettsak, opplyser duoen.

Det er nokre unnatak frå fritaket til næringslivet. Kraftverk, linjenett og oppdrettsanlegg får ikkje fritak, men Hydro Husnes vil vera unntatt, som ein av dei største ytarane til eigedomsskatt til Kvinnherad kommune.

– Motivasjonen er å hjelpa lokalt næringsliv. Sidan det ikkje er kome noko handsrekking frå regjeringa enno, vil me gjera det me kan for å hjelpa bedriftene, seier ordførar Hilde Enstad om forslaget.