Vil droppa bustadpakke på Heradstun

Kvinnherad kommune går inn for at tomta Heradstun i Rosendal berre skal nyttast til husvære for unge med nedsett funksjonsevne. Dermed må bustadpakken lokaliserast annan stad, viss den i det heile vert realisert.

Torsdag kveld fekk formannskapet ei orientering om planane for Heradstun. I april 2019 vart det vedteke å byggja eit bufellesskap for unge med nedsett funksjonsevne der, pluss at ein del skulle brukast til bustadpakken. Denne pakken legg opp til 20 husvære, fortrinnsvis for unge etablerarar.

Knut Bjørgvik frå «Bygg og eigedom» kunne avsløra at prosjektet truleg vert sterkt redusert.

– Vi hadde tenkt å byggja i tre etasjar, men det var det kjempestor motstand mot, sa han, og fortalde at naboprotestar har ført til at ein no ser for seg to etasjar.

Konsulentfirmaet Asplan Viak fremja opphavleg ei skisse for 8 omsorgsbustader, 21 privatbustader og parkeringskjellar. Bruttoarealet var på heile 7052 kvadratmeter. Kalkylen enda på 212 millionar kroner.

– Det var for høgt til vi kunne ha realisert prosjektet, sa Bjørgvik.

Kommunen bad då om ein nedskalert versjon. Her fekk ein plass til 8 omsorgsbustader og 12 private. Bruttoarealet var nedjustert til 3212 kvm. Kalkylen vart likevel så høg som 118 millionar kroner.

– Også det var for dyrt. Vi synest det vart for stor einingskostnad for dei som skulle kjøpa bustader, fortalde Bjørgvik.

Burettslag

I januar 2021 fekk eininga difor i oppdrag av kommunedirektøren å laga endå eit alternativ, no med berre omsorgsbustader. Dette alternativet har Knut Bjørgvik teikna sjølv. Her er det plass til 9 omsorgsbustader med omsorgsbase, samt 1 besøksleilegheit. Husværa er 72-80 kvadratmeter store. Dei skal organiserast i eit burettslag, så kommunen skal ikkje sitja som eigar. Bruttoarealet på 1792 kvm er forma som ein hestesko. Parkeringsgarasjen er fjerna. Totalprisen er rekna til om lag 52 millionar kroner.

– Det er også eit høgt tal, konstaterte Bjørgvik. Han trudde kostnaden vil bli på 5.771 kroner i månaden for dei som vil kjøpa.

– Det er cirka 2.000 billegare enn det dei kan leiga for i dag, understreka han.

Teikninga hans viser elles at det på tomta vert ståande att eit areal som eventuelt kan brukast til privat utbygging. Og i kjellaren kan det vera plass til til dømes aktivitetssenter eller Frivilligsentralen.

– Vi er litt usikre på vegen vidare, men vi prøver å koma fram til eit prosjekt som vi kan gå vidare med, avslutta Bjørgvik.

Kvalitetssjef Gunn Tove Petterteig opplyste at dei pårørande tykkjer det siste alternativet er det beste.

– Dei unge med nedsett funksjonsevne treng ein plass der dei får lov til å vera seg sjølve. Vår absolutte anbefaling er å gå vidare med alternativ 3, sa ho.

Leggja oss i selen

Reaksjonen til politikarane var litt blanda.

– Vi er nok mange som er skuffa over at det ikkje vert større utnyttingsgrad, men desse brukarane har venta så lenge at vi må gå for dette. Men vi må leggja oss i selen med eit mål om at det skal byggjast 20 leilegheiter til, og då vert utfordringa til kommunen å skaffa tomt. For også dette har det vore venta lenge på i Rosendal, sa Leif Sverre Enes (H).

– Eg trur og håpar at dette vert ei god løysing for desse brukarane. Men det er synd at vi ikkje får byggja i tre etasjar, følgde Gunnar Våge (Sp) opp.

Ove Lemicka (Frp) føreslo at kommunen kunne laga ei funksjonsbeskriving og invitera private aktørar til å koma med forslag til betre utnytting av tomta. Men Petterteig bad politikarane diskutera om det eigentleg er behov for ein ny bustadpakke.

– Har vi verkeleg bruk for denne typen bustader? Kven skal vi byggja for? På Husnes er det framleis ledige bustader, og det er ikkje ungdomen som har kjøpt, analyserte ho.

Ordførar Hans Inge Myrvold slo fast at bustadpakken i Rosendal vert tema i neste formannskapsmøte.