Vil byggje grøn bru mellom generasjonar
Rosendalshelga er ei nysatsing i samband med klimakonferansen, kor ungdommar og studentar i år vart inviterte for å diskutere store spørsmål kring det grøne skiftet og klimautfordringane ein no står ovanfor.
Publisert
Sist oppdatert
Fire av ungdommane som deltok denne helga var igjen for å få med seg delar av Rosendalsveko. Før det vart ønska velkommen tok dei seg tid til ein prat med Grenda om kva dei sat att med etter nysatsinga.
– Vi har vore gjennom fleire store spørsmål, og det har vore særleg nyttig å høyre kva dei ulike organisasjonane jobbar med. Det er jo eit stort generasjonsgap, og denne satsinga har handla litt om å byggja bru mellom vår generasjon og generasjonen før oss, fortel Emilie Flønes frå Bærekraftpilotane ved UiB.
Annonse
Ho er ein av tretten har delteke på det som var den første av vonleg mange Rosendalshelger. Frå same organisasjon kom også Vilde Paulsen.
– I vår generasjon har vi eit veldig stort engasjement, men det er ikkje vi som sit på makta. Difor er det viktig å finna ein måte å tette dette gapet, legg Paulsen til.
Lita tid for å nå måla
Noko av problematikken dei peika på var at det å stogga dei menneskeskapte klimaendringane er eit kappløp mot tida.
– Det er faktisk vi og dei som kjem etter oss som skal leve med desse endringane, skyt Flønes inn.
Annonse
For å nå berekraftmåla for 2030 skulle ein ha gjort store grep for mange år sidan.
– Desse prosessane tar det lang tid å snu, supplerer Lise Tenold. Ho er økonomiansvarleg i Om i morgon, studentorganisasjonen som har vore med på å arrangere ungdomscampen.
– Ja, ta til dømes spørsmålet om det hjelper å planta tre - ein skulle ha planta desse trea for ti år sidan, legg Sigurd Meklenborg Salvesen til. Han er nestleiar i Studentparlamentet ved UiB, og var som 19-åring den yngste deltakaren på ungdomscampen.
Grøn kompetanse søkjer grøne arbeidsplassar
Eit viktig poeng vart korleis det kan leggjast til rette for at dei yngre generasjonane får ta del i det grøne skiftet, noko som eksempelvis inneber å leggja til rette for grøne og relevante arbeidsplassar – ikkje berre i hovudstaden, men også i distrikta.
Studentane var klare på at Vestland er ein spanande region når det kjem til spørsmål om klima og energi. Universitetet i Bergen representerer i seg sjølv ein studentmasse på 20.000, men alle studentane Grenda snakka med var tilflyttarar. Dei var såleis klare på at dersom regionen vil halda på kompetansen som dei klima- og energiengasjerte studentane tileignar seg i løpet av studietida, krev det at det finst ein arbeidsmarknad som er relevant.
Annonse
Ungdommane let svært vel etter å ha nytta ei helg i Rosendal, der det mellom anna vart arrangert rebusløp til Skålafjell.
– Det har vore ei kjempespanande helg, og ikkje minst ein veldig inspirerande start på eit nytt semester, slår Lise Tenold fast med eit smil. Dei tre andre nikkar samde til denne oppsummeringa.
Vidare ønskjer studentorganisasjonane no å nytta erfaringane frå denne ungdomscampen til å nå ut til enno fleire, slik at det vert ei større samling klimamedvitne ungdommar til neste år. Dei avslutta med å understreke at slike arrangement er viktige arenaer for å skape samarbeid og byggje nettverk på tvers av fagfelt og kompetanse.
