Viktige bodskap og viktig markering

Årets Pride-markering samla eit hundretals store og små til parade og appellar utanfor rådhuset laurdag. Som dei føregåande åra var det Romsleg som stod for arrangementet, og konferansier Annette Bergstø Jacobsen nytta opninga til å takka breitt for støtte, hjelp og entusiasme kring arrangementet.

– Ta del i dugnaden

Appellhaldarar for dagen var ordførar Vegard Bjørnevik og ikkje-binære Christian Bjørgen, begge med oppvekst i Høylandsbygd.

Christian Bjørgen avslutta sin appell med ei oppmoding til alle som var til stades om å vera med på dugnaden for å skapa eit trygt Kvinnherad for alle.

– Ikkje peik, le eller ta bilete, kom bort til oss og spør, me er ikkje farlege. Ver med og normaliser oss, slik at me kan få leva som alle andre. Pass på korleis du snakkar om skeive i heimen, og om den gamle homofobe onkelen din kjem med oppgulp om Pride, så snakk til han! Ver ein del av dugnaden for eit trygt Kvinnherad for alle, uavhengig av hudfarge, religion, legning, seksualitet og klede.

Før det hadde han påpeika at det sidan 2000 har snart 9000 menneske flytta ut av kommunen.

– Fleire av dei har seinare kome ut som homofil, trans eller skeiv. Og sjølv om det ikkje gjeld alle, er det mange som fortel den same historia: dei måtte ut av kommunen for å få vera seg sjølv, sa han, og la til:

– Dei måtte vekk frå utdaterte haldningar, stygge blikk og kommentarar, ryktespreiing, blikking, utfrysing og mobbing. Dei måtte koma seg til ein stad der dei kunne vera den personen dei er på innsida, framfor den alle andre forventa dei skulle vere på utsida. Dei måtte ut av Kvinnherad ikkje fordi dei ikkje ville vere i Kvinnherad, men fordi Kvinnherad kunne ikkje gi dei tryggleiken dei trong, sa han vidare, før han spurde kva er det som gjer at det er sånn.

Ut av skapet

Bjørgen tok også dei frammøtte gjennom sin veg fram mot innsikt om seg sjølv.

– Eg blei verande i kommunen, og eg blei verande i skapet, kommenterte han.

Først i 2020 fann han ut av det, og først i fjor, 33 år gammal og tjue år etter han forstod at noko var annleis, kom Bjørgen ut som ikkje-binær.

– For heldigvis har det blitt betre, og Kvinnherad anno 2024 er sjumilssteg føre Kvinnherad anno 2004. Men me har framleis ein veg og gå, sa Bjørgen.

Då han kom ut i fjor, var det ikkje fordi han følte seg trygg, men fordi han var lei.

– Eg var lei av alle kommentarane på sosiale media. Eg var lei av alle som skreiv hatefulle ting om skeive kvar gong dei såg eit Pride-flagg. Eg var lei hatpratet om homofile. Lei hatpratet om transpersonar. Eg var lei av å sjå at folk skildra transpersonar som «sinnsjuke», dei same transpersonane eg har som venner, og som familie. Begeret var rett og slett fullt. Eg måtte ut av skapet, det var min tur til å melda meg inn i kampen, supplerte han.

– Så i dag vil eg kome med ei oppfordring: først av alt til våre folkevalde:

– Me er i 2024, no er det på høg tid at Kvinnherad kommune får inn rosa kompetanse og kunnskap om skeive og LGBT inn i skuleverket – for det er her me kan gjere forskjellen. Læreplanane seier at elevane skal lærast til å bli gagns menneske, då må dei lære at alle folk er like mykje verd, uavhengig av kven dei elskar.

– Alle skal føla seg trygge

Det var fleire politikarar som tok del i markeringa og kunne ta denne meldinga til seg, inkludert ordførar Vegard Bjørnevik.

– Sjølv om me feirar, må me også hugsa at utfordringane eksisterer. Meir enn ein av fire skeive i Norge har opplevd hets for sin seksuelle legning eller kjønnsidentitet, me veit at mange skeive føler seg tvungne til å flytta til byane for å føla aksept og eit miljø dei kan leva ope i, sa han i sin appell.

Bjørnevik meinte dette er ei stor utfordring som ein må halda fram og kjempa for at skal bli betre.

– Alle skal føla seg trygge og inkluderte i vår kommune, det er det store målet. Kvinnherad har alle forutsetningar for å lykkast med dette, men då må me alle samen dra i same retning, og visa at me er eit inkluderande samfunn, og at me verkeleg viser den ibuande toleransen eg trur me har i oss som fellesskap, sa Bjørnevik.

– Takk til alle de som er her i dag, de viser med dykkar oppmøte at me er på riktig veg. Takk for at de er gode førebilde, takk for at de er med på å gjera Kvinnherad til ein god og trygg plass for alle, der me bryr oss om kvarandre, der ein kan vera seg sjølv og elska den ein vil, la han til.

– Hjartevarmande

Stord-artisten Endre Olsen stod for dei musikalske innslaga både før og etter paraden hadde gått ned til kaien og tilbake til parkeringsplassen ved rådhuset.

Politiet var også til stades og passa på, på diskret avstand.

– Det er hjartevarmande kor mange som stiller med flagg og pyntar seg for Pride i dag. Det vart ei svært fin markering i dag, med både latter og alvor. Mange synest at det er viktig å markera Pride i Kvinnherad, noko som vart understreka av dagens sterke appellar. Nydeleg dag, fin musikk, god stemning, meinte Jorun Larsen og Anette Bergstø Jacobsen etter at arrangementet var vel i hamn.

– Me er veldig takksame for alle som var med å gjera markeringa til ein fest. Kort oppsummert ein suksess, slo dei fast.