Viktig kontrakt for Palfinger

– Kontrakten er god for Palfinger, for miljøet på Seim og byggjer på relasjonen me har med Herde Kompositt. Den fysiske bygginga skal skje i Ølve, med vårt design, våre sertifikat, våre former, vårt innkjøp og vårt ingeniørarbeid. Herde stiller med manntimar og utfører godt og rett arbeid, kommenterer Oddgeir Mælen ved salsavdelinga til Palfinger Marine Safety på Seimsfoss.

Atterhalden

At dei har inngått ein kontrakt, er omtrent dei einaste Mælen er i posisjon til å svara på.

– Eg har ikkje høve til å seia så mykje, men kan stadfesta at det er bygging av fem fritt fall-livbåtar. Verdiar kan eg ikkje gå inn på, klient kan eg ikkje gå inn på eller kva felt han skal til. Dette er styrt av kontrakten med klienten. Eg reknar med at det kjem ei pressemelding på eit seinare tidspunkt, men dette er det ikkje me som styrer, seier Mælen.

Det som Palfinger Marine Safety har styrt i denne kontrakten, er både prosjektering, enginerering og sal.

– Er det langt mellom desse kontraktane for dykk?

– Cruise har slite litt i pandemitida, noko som mellom anna resulterte i utsetting av produksjon på tildelte ordrar hos fabrikken i Ølve. Produksjon av desse startar no snart opp att. Offshore-prosjekta har også vore sett på vent i den verste pandemitida, men me ser no ei betring i begge desse marknadane, noko denne ordren òg viser. Det er ein god ordre, og me er glade for at me klarer å sikra oss han. Like eins er me nøgde med at me klarer å levera den kvaliteten som marknaden ynskjer, for det har vore ei omfattande teknisk kvalifisering i forkant, vedgår Mælen.

Lokalt forankra

I ein lengre periode har det vore lite lyd omkring Palfinger Marine Safety og aktiviteten deira, og ikkje alt dei gjer er like synleg for lokalmiljøet då mykje føregår internasjonalt.

– Det er bra at me også kan klara ein ordre som dette med eit heilt lokalt fotavtrykk. Palfinger er veldig glade for at me har den langsiktige avtalen med Herde, som har ein kompetanse som Palfinger har vore med å byggja opp. Avtalen med Herde sikrar oss at me har tilgang denne kompetansen, og slike oppdrag sikrar òg at Herde held på denne kompetansen.

Mælen er svært atterhalden med detaljar, og vil ikkje seia kva felt aller land livbåtane skal til, men dei skal ikkje til ein norsk kunde.

– I dagens marknad er alle kontraktar viktige, og denne bidrar godt til vår omsetnad, til våre arbeidsplassar og til at me kan fortsetja å jobba vidare med det me ynskjer å oppnå, som er å levera sikre og gode livbåtar til dei som ferdast på sjøen og har sine arbeidsplassar der, svarer Mælen på spørsmål om kva kontrakten betyr for Palfinger.