Vikla seg inn i gjerde – måtte skytast
Førre veke vart det i Omvikdalen oppdaga ein hjortebukk som drog på eit 50 meter langt straumgjerde. Det vart då bestemt å avliva dyret.
Publisert
Sist oppdatert
Det var tysdag kveld at jegeren Åsmund Hjelmeland hadde vore inne i Omvikdalen og kikra etter hjort. På heimveg ned dalen såg han noko spesielt i Omvikjo.
– Det var heilt tilfeldig at eg såg han. Då eg kom køyrande stod han og beita rett på sida av vegen. Hjorten hadde veldig mykje lett-straumgjerde rundt horna. I alt var seks pålar med tilhøyrande nett tvinna inn i horna og under mulen. Det var dessutan tydeleg at gjerdet hadde lege og subba i bakken, for dyret hadde også sårmerke på bakbeina, fortel Hjelmeland til Grenda.
Annonse
Så vidt vi forstår er ein rull med slike gjerde 50 meter lang og om lag éin meter høg.
– Men hjorten greidde å eta?
– Ja, han gjorde det, men han måtte ha hovudet litt på skakke for å få det til. Det har eigentleg vore flaks at gjerdet ikkje har sett seg fast i eit tre eller liknande når hjorten har bevega seg, analyserer Åsmund Hjelmeland.
Uflaks
Annonse
Han snakka med andre jegerar og fekk høyra at dei hadde sett dyret tidlegare og hadde planar om å skyta det. Hjelmeland kontakta jaktleiaren i Omvikjo, og fortalde kva han hadde funne. Det vart då konkludert at det einaste rette var å avliva dyret umiddelbart. Det dreia seg om ein mellomstor bukk på 80 kilo.
– Kva tenkjer du om at noko slikt kan skje?
– Det er uunngåeleg. Når ein skal ha sauene ute for å beita graset som ikkje har blitt slege, så må ein setja opp slike gjerde, det er den einaste moglegheita ein har. Så dette handlar berre om uflaks, vurderer Åsmund Hjelmeland.
