Vidar skal sykla i det aller første verdsmeisterskapet i e-sport

Vidar Mehl skal representera Norge i det som blir eit historisk sykkel-VM 9. desember. Då går nemleg tidenes fyrste VM i E-sport av stabelen.

– Eg har aldri vore med i noko verdsmeisterskap før, så å få lov til å bli med på dette er veldig artig. Eg er litt stolt av det, kjenner eg, seier Vidar Mehl.

Den allsidige syklisten frå Omvikdalen har vore ein føregangsmann i inntoget av den virtuelle sykkelsporten i Norge. Og gjennom ei rad imponerande resultat i ulike e-sykkelritt, har han no sikra seg ein av i alt to plassar på det norske herrelandslaget til det historiske verdsmeisterskapet før jul.

– Eg hadde eit lite håp om å bli tatt ut, men eg hadde ikkje forventa det. Eg føler jo at eg har vore med å bana litt veg for sporten her til lands, så det er veldig kult å få lov til å bli med på det som blir tidenes første VM, seier Mehl.

Smertegrotte

33-åringen, som på Kristi Himmelfartsdag sin sykla lenger enn nokon andre har gjort på 24 timar, liker utfordringane eit e-sport-sykkelritt byr på.

– Det blir meir eit spel. Det er veldig annleis enn eit sykkelritt ute på landevegen. Her kan du vera taktisk på ein annan måte, og du må lesa rittet på andre måtar enn du gjer ute. Det er heile vegen små marginar og taktiske val som gir store utslag. I tillegg er ritta kortare og meir intensive, ein driver ikkje på i seks timar, som i Tour de France. Det passer meg bra, seier Mehl.

Han har brukt tida i sommar på å flytta lenger inn mot sentrum i Gjøvik, og held i dag på med siste finish på si nye sykkelhytte i hagen – eller paincave som han sjølv kallar ho. Her skal han bruka timane godt fram mot 9. desember.

– Det er her oppladinga til VM vil skje, ler han og legg til:

– Eg treng timane. Det har vore ei brutal nedgåande pil etter 24-timaren og everest-rittet eg deltok i før sommaren. Kombinasjonen av dei to førte til at eg gjekk på ein liten smell, og så ramla det heile litt saman med koronaen og få ritt. Men med uttaket til VM så har eg fått eit skikkeleg mål å sjå fram mot, så no blir det dedikert trening fram til dess.

Klaffar alt er alt mogleg

I sjølve verdsmeisterskapen stiller 100 syklistar til start, og sjølv om han ikkje har sett seg noko stort mål endå, er det å koma blant dei 50 beste i alle fall eit lite delmål i starten på oppkøyringa.

– Men om ein har ein maks dag der alt klaffar, så er alt mogleg. Eg veit at eg er frykteleg god på lange drag, som det vil bli litt av. Det er rå kraft som skal til, så om det er ein dag der alt går vegen, så drøymer eg jo om å koma topp ti, seier han.

Verdsmeisterskapen vil bli sendt i mange ulike kanalar, her vil det også vera mogleg å følgja dei 100 syklistane som stiller til start. Blant anna Vidar Mehl og hans lagkamerat Jonas Iversby Hvideberg, som utgjer den norske landslagsduoen i VM.