Vidar Mehl er klar for Movistar

Då Movistar, som det første World Tour-laget i verda, bestemte seg for å satsa på e-sport, handplukka dei Vidar Mehl til å bli ein del av laget.

– Herregud så kult! Det er ganske vanskeleg å beskriva med ord kva eg tenker, men det er jo ganske vilt. Vetle meg på eit så stort verdsomspennande lag. Det er heftig, ler omvikdelingen når Grenda ringer for å gratulera.

For spesielt inviterte

Vidar Mehl har det siste året bana veg for norsk e-sykkelsport, og har tråkka seg fram til fleire uhyre imponerande resultat i sveittebua si på Gjøvik. Torsdag 4. mars kom kanskje det aller største.

Då stilte han til start i finalen av rittserien «Movistar Challenge», der spesielt inviterte ryttarar frå Zwift Racing League Premier Division-liga kjempa om ein av fem plassar på Movistar sitt nyetablerte Zwift-lag.

I finalen var over 50 ryttarar blitt til 18. Blant dei Vidar Mehl.

– Det har vore to veker med to ritt i kvar. 50 gjekk vidare frå fyrste rittet og så gjekk 18 vidare til finalen. Dei som var med i uttakinga var handplukka frå den øvste Zwift-divisjonen, og då var nivået der etter, seier Vidar.

Frå lagkamerat til konkurrent

Men ingen kom betre ut av konkurransen enn Vidar sjølv. For konkurransen gjekk ikkje berre på sportslege resultat. Det spanske storlaget er nemleg på jakt etter gode syklistar som samstundes kan profilera dei på best mogleg måte. Difor vart det ikkje klart kven som var plukka ut til laget før måndag, elleve dagar etter sjølve finalerittet.

– Eg er jo god, men eg er på inga måte verdas beste. Så dei har nok sett andre kvalitetar i meg òg. Eg reknar med dei har stalka oss ganske så heftig, og dei kjenner meg nok veldig godt allereie, ler han.

Han har no signert for Movistar og skal sykla for gigantlaget det neste året. Det betyr at han no skal konkurrera mot sine tidlegare lagkameratar i laget han sjølv var med å byggja opp.

– Det er bakdelen med det, at eg må forlata Kalas. Men sånn er det, eg bytar innandørslag til Movistar. Sjølv om det vert vemodig å gå frå Kalas, så tenker eg at det definitivt er verd det. Så har eg heldigvis ein ståande avtale med Kalas om Movistar skulle slutta satsinga si, seier Mehl.

Lukrativt

Når sesongen vert tråkka i gang 6. april, gjer Vidar det i det spanske storlaget velkjende blå fargar. Og sjølv om han ikkje vert proff av dette her, er den nye avtalen likevel lukrativ.

– Vi får ikkje løn, det gjer vi ikkje. Men vi får frykteleg mykje gode likevel. Det blir mykje nytt utstyr, både syklar og andre ting. Eg kansellerte ein sykkel til 50.000 kroner i går, så for meg betyr det mykje. Det er det nærmaste eg har vore proff, ler han.

Utandørs har Movistar eit av dei største apparata i sykkelsirkuset, men i Zwift vert det litt andre bollar.

– Det kjem til å bli knallhardt. Vi har berre fem mann på laget, og vert med det sårbare om det blir sjukdom eller andre fråvær. Der har til dømes Kalas fleire å spela på. Men sjølv om det blir beintøft, så vert det jo gøy. Det er jo ikkje gøy om ein ikkje slit litt, seier Mehl.