Vidar går laus på nok ein norgesrekord: – Blir skuffa om eg ikkje klarer det
Vidar Mehl frå Omvikdalen skal søndag prøva å slå den norske rekorden på 200 kilometer tempo.
Publisert
Sist oppdatert
– Eg skal koma meg så fort som mogleg gjennom 200 kilometer på sykkel. Enkelt og greitt, ler Vidar.
Rekorden innan rekkevidde
Annonse
På grunn av koronaen har det lenge vore usikkert korleis årets konkurransesesong kom til å bli for syklistane rundt om i landet. Difor bestemte Vidar seg tidleg for at han ville prøva å slå ein norgesrekord denne sommaren.
For å klara det må han bruka mindre enn 4 timar og 49 minutt på 200 kilometer.
– Eg føler at det er innan rekkevidde. Det er ei snittfart eg veit eg kan slå. Eg har testa litt ei stund, og heldt ei høgare snittfart på ei løype på 150 kilometer for ikkje så lenge sidan. Det var på trening, så om eg har ein tilsvarande dag som det, så bør det går, seier han.
Men det seier seg sjølv at 200 kilometer på sykkelsetet i ein fast tempoposisjon kjem til å bli tøft, både fysisk og mentalt.
Annonse
– Det går ikkje av seg sjølv dette her, det kjem nok til å gjera vondt både her og der. Du sit samankrøka når du syklar tempo, så det vert nok sårt og lite behageleg. Men eg er i god form, og kjenner at eg gler meg til å bli ferdig, seier han.
43 kilometer i timen
Han har staka ut ei 25 kilometer lang løype i Kongsvinger-området som har blitt godkjent av Norges sykkelforbund. I tillegg til det har han måtta ordna med ei rekkje godkjenningar frå ulike etatar for å kunna leggja ut på dette norgesrekordforsøket.
– Eg har stor respekt for dei som arrangerer sykkelritt. Berre dette norgesrekordforsøket har kravd veldig mykje planlegging. Det er ikkje berre til å setja seg på sykkelen og trø, seier Vidar og held fram:
– Vi må ha ein følgjebil som varslar at det er sykkelritt på gang i front, så må vi ha ein motorsykkel føre meg og ein bil bak meg med dommar frå forbundet. Så det har vore mykje å få på plass i forkant.
Men alt det praktiske er no i orden, og han er klar til å kjempa mot seg sjølv gjennom 200 beinharde kilometer. Målet er å minst slå den tidlegare rekorden med ti minutt.
Annonse
– Utan maskinelt uhell, så blir eg skuffa om eg ikkje klare rekorden. Då skal eg ha gjort nokon feil undervegs. Målet er under 4,40, men om eg får god flyt så ynskjer eg å koma ned på 4,35, seier Mehl.
Det betyr i så fall at han må halda ein snittfart på 43 kilometer i timen frå start til mål.
– Heldigvis er det ei relativt flat løype, så det skal gå, avsluttar han.
