– Vi må hugse på å ha hjarte for andre

Det var ein god stemning i den stappfull salen i Dalheim fredag kveld. Her hadde 120 medlem i 4H med foreldre stua seg godt inn for haustfesten.

– Vi skulle ynskje vi kunne invitera sysken og besteforeldre også, men vi har rett og slett ikkje plass, fortel klubbrådgjevar Venke Ølvestveit.

Lauvsprett 4H har 60 medlem, og er den største klubben i Hordaland. 99% av medlemmane er frå Omvikdalen og Matre, men klubben er for heile Kvinnherad.

– Her er alle velkomne. Ein treng ikkje lika fotball, handball eller ein spesiell ting, her har vi ein miks av interesser, og alle blir inkluderte, fortel Ølvestveit.

Utdeling og talar

Denne fredagen var det utstilling av årets prosjekt, underhaldning og taco før taler og utdeling av nåler og plakettar.

– I år har vi seks stykke som skal få plakett, det er det største kullet i mi tid her i Omvikdalen, fortel Ølvestveit stolt.

Dei seks er; Halvor Bjørnebøle Hass, Madel Søllesvik, Mia Huke Hjelmeland, Magnus Haugse, Hedda Svendsen og Ingrid Omvik.

Aspirantar, juniorar og seniorar fekk merker og fagskjold for godt gjennomførte år og prosjekt.

Johannes Hjelmeland frå bondelaget hadde mange gode ord å seie om 4H, og hadde med seg ein gåve frå bondelaget.

– 4H er ein kjempegod arena til å dyrka hobbyen sin, og kanskje til og med få nye hobbyar. Det er ikkje alle som driv med fotball eller sport, og då er 4H ein utmerka plass til å ha ein kjekk fritid der alle kan vera seg sjølve, sa han.

Hjelmeland takka foreldre og pådrivarar for å vera med å gjere 4H til det det er, og overrekte 5000,- kronar til vidare arbeid til 4H.

– Vi i Bondelaget vil takka for eit godt samarbeid med 4H, de stiller alltid opp når det er noko som skal arrangerast. Det er bra for bygda og for bygdene rundt, og det er godt å dra lasset ilag, sa han.

Forskjellige prosjekt

Bjørn Rune Bergane, som var rektor på Omvikdalen skule i 20 år, vart introdusert som kveldens høydepunkt av konferansierane Johanna Falk og Thea Flatebø. Han haldt ein flott tale til ungdommen.

– Det er fira H-er, og dei står for hovud, hender, helse og hjarta. Og eg tykkjer at den siste er den viktigaste. Det hjelp ikkje om du er flink med hender eller hovudet eller har god helse om du ikkje har hjarta for andre, sa han og la til;

– Det er kanskje vanskeleg i den tida vi lev i no, men vi må hugse på å bry oss om andre.

Bergane hadde alle sine fira barn i 4H, nokre meir engasjerte enn andre. Dotter hans brukte 200 timar eit år på å perle alle flagg i verda.

– Men son min, eg skal ikkje nemna namn, han brukte same prosjektet to år på rad utan at Venke og dei andre la merke til det. Han berre endra på årstalet, lo han.

Nede i kjellaren sto prosjekta til medlemmane stilt ut, og her fann ein alt ifrå baking og matlaging til Lego og gaming. Tilde Leganger, Malin Hellingsrud Fosse, Martine Lønning, Celine Apeland og Karen Søllesvik, som hadde prosjektet «design og redesign» fekk ei lita gåve for eit særs godt gjennomført prosjekt.