– Vi kan ikkje godta dette

Over Guddalselva heng den 23 meter lange Seimsfoss bru. Parallelt er det bygd ei eiga bru for mjuke trafikkantar. Øyvind Hardeland meiner ingen av bruene er i god nok stand. For å ta gang- og sykkelbrua fyrst. Spesielt på sida mot Bondekompaniet er det til dels stor høgdeskilnad mellom fortauet og brua. På det verste er kanten 5-7 centimeter høg.

Pressa ut

– Det er vanvitig. Korleis skal ein få folk til å sykla over her? Har dei ikkje HMS? Dette har med sikkerheit å gjera. Køyrer du med tynne dekk her, så kan du fyka på trynet. Slik det er no vert folk på sykkel i staden pressa ut i bilvegen. Kva hjelper det med trafikksikringsplanar når det ikkje blir følgd opp, sukkar Hardeland.

Han slår fast at her må brueigar Vestland fylkeskommune syta for at overgangen mellom fortau og bru vert heilt flat.

– Då dei asfalterte var dei ikkje nøye nok. Faget har svikta, melder mannen som sjølv jobba med vegar og vegvedlikehald i yrkeslivet.

Ingen unnskyldningar

Bilvegen opprører endå meir. På sørsida er det eit ganske stort hòl i vegbana, som truleg alle bilistar merkar godt. Hòlet har vore der i årevis, men Hardeland fryktar at systemet for å melda frå om slike feil og manglar, har blitt så tungrodd at innbyggjarane føler det ikkje nyttar å gje beskjed.

– Folk har gitt opp, seier han.

Men Hardeland, som sjølv køyrer over brua kvar dag, vil ikkje gje seg, og kjem difor med klar beskjed til fylket.

– Nok er nok. Vi kan ikkje godta dette, for det finst ingen unnskyldningar. Kven tek ansvar? Ein har for dårleg kontroll når slikt kan føregå. Må politikarane inn i saka?, kommenterer han.

– Dei har vore der fleire gonger og fylt i, men så har det rast ut igjen neste dag. No får vi tilbakemeldingar om at folk svingar over til feil side av vegen for å unngå hòlet. Dei som er kjent her gjer det, dei som ikkje er kjent hamnar i hòlet, legg Hardeland til.

Utbetrast i år

Mariann Kråkenes Jørgensen, einingsleiar for vedlikehald, drift og beredskap – Drift SØR, Avdeling for infrastruktur og veg i Vestland fylkeskommune, opplyser til Grenda at jobben på Seim skulle vore utført i fjor.

– Men på grunn av kulde var det ikkje mogleg å få dette utført i tide. Vår entreprenør har lappa jamleg, men det er vanskeleg å få dette til å bli liggjande. Permanent lapping vil bli utført når vi får tilgang på massar, det skjer når asfaltverka opnar for sesongen i mai månad.

Høgdeforskjellen mellom gangveg og gangbru vil òg bli utbetra i år, svarar ho.