– Vi hadde ingen forkunnskap til slike brannar

Kvinnherad brann og redning mangla sentral kunnskap for å sløkkja brannen i batterirommet på MF «Ytterøyningen». Det kjem fram i den ferske evalueringsrapporten etter ferjebrannen.

Over 14 sider skriv Kvinnherad brann og redning om metodar og erfaringar dei gjorde seg undervegs og i etterkant av brannen i batteriferja MF «Ytterøyningen» 10. oktober. Ein brann som har ført til skadar for minst 20 millionar kroner, og som bydde på heilt ukjente utfordringar for Kvinnherad brann og redning.

– Scenarioet med brann i ei batteriferje av den storleiken som i MF «Ytterøyningen» var ny for brannvesenet. Vi hadde ingen forkunnskap om brann- og/eller eksplosjonsfare knytt til ferjer med batteridrift, konkluderer Kvinnherad brann og redning i rapporten.

På grunn av ukjente risikofaktorar og det usikre skadeomfanget, valde brannvesenet ei passiv tilnærming til brannen. Noko som i etterkant har vist seg å vera ei fornuftig avgjersle.

– Utviklinga av hendinga og tileigna kunnskap i ettertid, viser at oppvarming av batteri i lukka rom utgjer stor fare for eksplosjon. Dette underbyggjer at tiltaka med å etablera sikkerheitssone og sørga for minst mogleg eksponering av innsatspersonell, var ei rett avgjersle. Dette bør vera eit av dei første tiltaka ved slike hendingar, står det å lesa i rapporten.

 

Samlar kompetansen

Rapporten, som er den fyrste av sitt slag, er laga som eit erfaringsverk til brannvesen rundt om i heile landet. Ettersom batteriteknologien er venta å auka dei komande åra, kjem Kvinnherad brann og redning med fleire tiltak dei meiner skal bidra til å løfta kompetansen på dette området.

– Brannvesena har ikkje klart å følgja med på utviklinga og vore godt nok førebudd for beredskapssituasjonar knytt til denne teknologien, skriv dei før dei ramsar opp ei rekkje vidare tiltak, eit av dei er å samla relevant fagkompetanse innan batteriteknologi i løpet av 1. kvartal 2020.

– Vest brann og redningsregion er også i kontakt med Høgskulen på Vestlandet for eit samarbeid om ei problemstilling til ei framtidig bacheloroppgåve ved branningeniørstudiet, står det å lesa avslutningsvis.

Her kan du lesa rapporten i sin heilskap.