Vestland fylkeskommune vart årets nynorskkommune

Det var kultur- og likestillingsminister Anette Trettebergstuen som hadde gleda av å overrekkja prisen til fylkesordførar Jon Askeland på Litteraturhuset i Oslo.

I år har det vore særskilt fokus på kommunar som har sett i gang tiltak for å etterleva krava i den nye språklova. Her har Vestland fylkeskommune gjort ein innsats som bidrog til at dei endeleg innkasserte prisen, som i år er på 200.000 kroner.

«Vinnaren har arbeidd grundig og systematisk for å sikre at tilsette kjenner språklova, og at dei har kompetanse og høve til å følgje opp. Dei syner strategisk leiarskap, og nynorskarbeidet har ringverknader for heile regionen», heiter det i juryen si grunngjeving.

Felles ansvar å ivareta språket

Vestland fylkeskommune har til dømes oppdatert retningslinene for klart språk og god nynorsk, slik at dei samsvarar med språklova. Dei har dessutan orientert om språklova på avdelings- og seksjonsmøte og sendt ut Språkrådets digitale kurs om språklova til over 6000 tilsette.

Under utdelinga utheva Trettebergstuen målsetjinga for prisen:

– Gjennom godt språkarbeid støtter kommunane opp under språkleg fellesskap og identitet. Språkbrukarane skal ikkje ha ansvaret åleine for å ta vare på språket vårt, det skal vi gjere som eit fellesskap, sa ho.

Kan Kvinnherad hevda seg i konkurransen i år?