Vestland fylke vidarefører alle prosjekt

Alle påbyrja og planlagde bygg- og vedlikehaldsprosjekt i regi av Vestland blir vidareført.

Det er ein av fleire positive konklusjonar etter onsdagens nettmøte mellom fylkeskommunen og ulike næringsorganisasjonar i fylket. På møtet var den dramatiske situasjonen i næringslivet, særleg for små og mellomstore verksemder, eit sentralt tema.

– Det er som å bli treft av to tsunamiar på ein gong. Koronaepidemien ser næringslivet på store prøvar, og den rekordlåge oljeprisen forsterkar det dystre bilete for heile leverandørindustrien, seier Marit Warncke på vegne av Bergen Næringsråd og Næringsalliansen i Hordaland i ei pressemelding.

Under møtet vart ei rekkje konkrete framlegg drøfta. Blant anna at alle starta og planlagde byggeprosjekt i regi av Vestland må vidareførast, at kommunikasjonstilbodet ikkje må reduserast meir enn i dag og at kommunale og fylkeskommunale restriksjonar på arbeids- og næringsreiser må opphevast.

 

– Ta kontakt med oss

Kvinnherad Næringsservice går under paraplyen til Næringsalliansen i Hordaland, og prosjektkoordinator Kristine Røyrvik oppmodar no verksemdene om å stå saman i denne perioden.

– Aktørane i Næringsalliansen jobbar tett og har spelt inn korleis situasjonen er i våre områder. Her er det viktig å stå saman i tida framover. Vi må rusta oss godt for tida som kjem etter at toppen av koronakrisa har lagt seg, seier Røyrvik.

I tillegg til det bed ho verksemdene om å ta kontakt om dei har noko dei lurer på.

– Eg oppmodar dei bedriftene som ynskjer råd, tips eller berre nokon å snakka med om å ta kontakt med oss. Vi følgjer godt med på dei ulike tiltakspakkane, samt ulike støtteordningar regionalt og nasjonalt som kan vera til hjelp for Kvinnherad-pakkane, seier prosjektkoordinatoren.

Næringslivet i Vestland ventar at den neste tiltakspakken frå regjeringa vert retta mot små og mellomstore verksemder med låge marginar og liten likviditet.

– Men lokale og regionale styresmakter må òg medverka til at skadeverknaden vert avgrensa. Fylkeskommunen har ei viktig rolle som oppdragsgivar på bygg- og vedlikehaldsprosjekt. Vi er veldig glade for at Vestland fylke vidarefører desse, slik at arbeidsplassar kan vernast om, seier Warncke i pressemeldinga.

Etter møtet med fylket, ventar næringslivsorganisasjonane i Vestland fylke at det kan bli lansert ein fylkeskommunal tiltakspakke ein av dei nærmaste dagane.