Veslemøy (10) og Vegard (12) fekk seg speidarvener frå heile verda

Joti er ei forkorting for «Jamboree On The Internet», verdas største speidararrangement der speidarar frå heile verda kontaktar kvarandre og får moglegheit til å knyta vennskapsband gjennom chatting.

Speidargruppa i Rosendal hadde opphaldsstad i praksisfløyen i Rosendal, og då Grenda var innom sat det ni forventningsfulle barn og vaksne føre kvar sin datamaskin, og speidarleiar Gunn Kleppe og medhjelpar Mari Mehl Willumsen sprang rundt for å hjelpa dei med å kopla seg på eit nokså innvikla Joti-program, spør du bladfyken.

– Me har valt å gjera det via internett, men mange gjer det ved hjelp av amatørradio i staden. No er det nokre år sidan me har delteke, så det tek litt tid å koma inni det igjen, seier Gunn.

Ivrige medlemmar

Men det tok ikkje lange tida før damene hadde fått dreisen på programmet, og speidarane vart kopla på. No kunne speidarane endeleg byrja å snakka med andre, men kven skulle dei prata med først? «Jojo» frå Afrika, «Hoppespretten» frå Oslo eller «Yo» frå Tyrkia?

– Eg trur me vil snakka med nokon frå Norge, i alle fall til og begynna med, slik at me forstår kva dei skriv til oss, seier ei spent og ivrig gutegruppe beståande av David Eikeland (8), William Johannesen Øyjord (8) og Thomas Eikeland (8). Dei alle er nye medlemmar av speidargruppa i Rosendal, og har berre lovord å koma med om det å vera speidar:

– Det er veldig gøy å vera med i speidaren, spesielt sidan me lærar oss mange nye ting, seier William medan Thomas legg til.

– Det er kjekt å finna på morosame ting med venner, og i dag kan me jo bli kjent med enno fleire.

Speidarkompis frå Afrika

Gunn og Speidargruppa i Rosendal har delteke på joti fleire gongar tidlegare, men for denne gruppa var det deira første gong. Og spennande var det å kontakta speidarvener verda rundt.

– Eg snakkar med ein speidar frå Algeria i Afrika, og då skriv me på engelsk. Eg er faktisk god i engelsk, så det er inga problem. Det er skikkeleg kult å bli kjent med folk frå forskjellege land, smiler Vegard Ørbeck, medan han spør nettkompisen sin om korleis han har det.

– Etterpå skal me prøva å få kontakt med nokon frå USA, seier Veslemøy Skeie Helle.

For kvar speidar dei fekk kontakt med, hang dei opp ein teiknestift på kartet som viste kor i verda denne speidaren kom i frå. Det gjekk sport i å festa flest teiknestiftar på tavla.

– Det er eit svært kjekt arrangement, og i tillegg til at deltakarane får bli kjent med andre, får dei også læra seg om koding gjennom forskjellege oppgåver dei må løysa i løpet av dagen. Før i tida sat me heile helga, men denne gongen blir det berre denne eine dagen, noko eg trur er nok når dette er deira første gong med Joti. I tillegg skal me kosa oss med litt andre aktivitetar. Og forresten, me har alltid plass til nye speidar-medlemmar, smiler Gunn.

Deltakarane kunne også gleda seg over taco, kakao, skattejakt og forskjellege eksperiment denne kvelden.