Veronica Thorsen innstilt som ordførarkandidat for Senterpartiet

Nominasjonsnemnda i Kvinnherad Senterparti har gjort ferdig sitt arbeid, og innstiller Veronica Thorkildsen Thorsen som sin nye ordførarkandidat. Thorsen har ikkje tidlegare vore aktiv i lokalpolitikken, men er for mange ein kjenning gjennom sitt arbeid som dagleg leiar i Kvinnherad Frivilligsentral.

– Vil kunna kle rolla

– Med Thorsen får Senterpartiet og Kvinnherad ein ordførarkandidat som har særs gode eigenskapar og verdiar. Samlande, raus, kreativ og nytenkjande. Med stor gjennomføringskraft er nominasjonsnemnda overtydd om at Thorsen vil kunne kle rolla som framtidig ordførar på ein unik måte.

Slik skildrar leiar i nominasjonsnemnda Andreas Ølvestveit toppkandidaten deira i ei pressemelding i samband med nominasjonsnemnda sitt arbeid.

– Eg er audmjuk for tillita frå Senterpartiet. Eg har lenge vurdert moglegheita i å engasjera meg meir i det politiske arbeidet i Kvinnherad, og har etter nøye vurderingar kome fram til at det no var riktig tidspunkt. Eg gler meg til å ta fatt på arbeidet med å utforma det politiske programmet, saman med resten av det sterke Senterparti-laget, uttrykkjer den ferske ordførarkandidaten i pressemeldinga.

Rutine og debutantar

Saman med Thorsen finn ein både noverande kommunestyrerepresentantar, og nokre heilt nye kandidatar. Stein Olav Ølvestveit og Svein Åge Vangdal er innstilt på høvesvis 2. og 4. plass. Begge har lengre politisk erfaring, og møter i kommunestyret i dag. Ølvestveit er også utvalsleiar for Plan-, teknikk- og miljøutvalet. Vangdal sit i Levekårsutvalet.

På 3. og 6. plass finn ein nye kandidatar i Julie Holmedal Askeland og Jarle Andresen. Askeland er lærar ved Kvinnherad vidaregåande skule, mens Andresen er dagleg leiar i privat verksemd. Begge har vore særs aktive gjennom ulike lag- og organisasjonar i kommunen.

Mange hadde tippa Marianne Nordhus som ein mogeleg ordførarkandidat for Senterpartiet, spesielt etter at ho var deira ordførarkandidat i situasjonen som oppstod etter at dåverande ordførar Hans Inge Myrvold vart valt inn som fast møtande vararepresentant til Stortinget i september i fjor.

– Marianne Nordhus har valt ei politisk satsing for Kvinnherad og regionen gjennom fylkestingsvalet. Dette er særs viktig for oss alle, då denne representasjonen er viktig med tanke på samferdsle, vidaregåande opplæring, kultur og næringsutvikling. Ho er til kommunevalet innstilt på 5. plass av nominasjonsnemnda, kommenterer Andreas Ølvestveit i pressemeldinga.

Ordførarkandidaten deira seier dette om posisjonen ho no blir gitt:

– Kvinnherad er ein fantastisk kommune på mange måtar. Eg er veldig motivert i å gjera kommunen til ein enno betre kommune, der ein utnyttar potensialet med fagleg sterke og kvalifiserte medarbeidarar på alle nivå, i kombinasjon med sterke bygdesamfunn og eit variert næringsliv. Alt ligg til rette for at Kvinnherad skal bli den beste kommune vekse opp i, leva eit innhaldsrikt og meiningsfylt liv, og ikkje minst kjenna på tryggleik og omsorg i alle livets fasar, seier ho i pressemeldinga.