Verdsdag for psykisk helse: Livet under og etter pandemien

Verdsdagen for psykisk helse er ein årleg markering som vart heldt over heile verda den 10. oktober. Mental Helse har sidan 2002 koordinert arbeidet med verdsdagen i Norge på oppdrag frå Helsedirektoratet. Dagen skal auka kunnskap og openheit om psykisk helse, og fremma gode levevanar, skriv Mental Helse.

Kampanjetema i år er livet under og etter pandemien, og skal klårgjera kor verdifulle me er for kvarandre for å førebygge einsemd og utanforskap.

Folkehelseinstituttet sin undersøking om smitteverntiltak, livskvalitet og psykisk helse frå vinteren 2020, viste at fleire har slitt med einsemd og psykiske plager i denne perioden. Unge og åleinebuande har hatt den største psykiske belastninga, og spesielt i områder kor smitteverntiltaka har vore mest omfattande, skriv Mental Helse.

Tøff periode

Lokallaget Mental Helse Kvinnherad skal markere verdsdagen med stand på Husnes Storsenter 9. oktober.

– Me håpar mange ynskjer å koma innom standen. Her kan ein slå av ein prat og få seg ein kopp kaffi. Det hadde også vore kjekt med fleire medlemmar, seier Margunn Anita Erdal, styreleiar i Mental Helse Kvinnherad.

Margunn meiner det er viktig å markere ein slik dag, og snakke høgt om mental helse.

– Mange har slitt med einsemd og psykisk helse i denne tøffe perioden. Slik har det i alle fall vore for meg. Me har hatt nokre telefonar frå folk som har slitt, og eg veit at psykisk helsefagarbeidarar har hatt stor pågang, fortel ho og held fram:

– No er det viktig å koma seg ut blant folk, og snakke høgt om mental helse. Eg gler meg til markeringa, og håpar mange tek turen innom standen vår.