Verdas største dugnad treng fleire frivillige

Under ein pressekonferanse måndag, fortalde leiar for aksjonskomiteen Anja Thunold om årets aksjon og kva midlane som blir samla inn vil gå til.

– Pengane vil gå til fire land med forskjellige problemstillingar; Bangladesh, Sierra Leone, Den demokratiske republikken Kongo og den sentralafrikanske republikk, sa ho.

I Bangladesh finn vi verdas største flyktningleir, og hepatitt C er ein vanleg sjukdom her. Midlane vil gå til testing, kartlegging og behandling av viruset, og førebyggande arbeid.

Sierra Leone slit framleis etter Ebola-utbrotet i 2014 og det er kritisk mangel på helsearbeidarar i landet. Midlane frå Tv-aksjonen vil hjelpa med behandling av fleire barn for malaria og andre sjukdommar, og opplæring av fleire helsearbeidarar.

I Den demokratiske republikken Kongo er fleire enn fem millionar på flukt i eige land. Det er lav vaksinedekking i landet, og mange barn mister livet av sjukdommar som kunne vore avverja. Pengane frå tv-aksjonen vil gå mot å sørga for at fleire blir vaksinert mot vanlege sjukdomar som meslingar.

I den sentralafrikanske republikk er HIV og Aids ein av dei vanlegaste dødsårsakene. Midlar frå årets tv-aksjon vil gå til å sørga for at fleire HIV- pasientar blir testa og forhåpentlegvis får livreddande medisinar, og førebyggande arbeid for å auka kunnskapen.

– I tillegg til dette skal ein del av midlane brukast til å forska på å utvikla medisinar mot dødelege og gløymte sjukdommar. Leger utan grenser og DNDi vil setja søkjelys på sjukdomar som dei fattige og nedprioriterte blir råka av, fortalde Thunold.

Treng fleire frivillige

Aksjonen har grunna Korona vore både heildigital, og halvdigital. Dette året vil bøsseberarane gå dør til dør som dei gjorde før pandemien.

– Dette er vi veldig glade for. Vi ser absolutt at hjarta i aksjonen er møtet i døra, sa Thunold, og la til;

– Det vil sjølvsagt også i år vere mogleg å oppretta digitale bøsser eller betala med Vipps eller SMS for dei som ikkje har kontantar eller ikkje er heime.

I Kvinnherad er det ca. 25 såkalla rodeleiarar, som mellom anna har ansvar for å få tak i bøsseberarar. Sæbøvik, Husnes, Uskedalen, Rosendal, Baugstranda, Hatlestrand og Ølve har meldt inn at dei treng fleire folk, nokre bygder treng kanskje fem stykke medan andre treng fleire.

– Vi oppmodar alle som er heime og har tid til overs til å bli med på årets viktigaste søndagstur, sa Thunold.

Torsdag er det klart for ei telefonrunde der ordførarane i Sunnhordland samlast for å ringa rundt til sitt lokale næringsliv. Ordførar Hilde Enstad er innstilt på å bruka konkurranseinstinktet.

– Eg skal ringa til så mange eg klarar, og eg håpar sjølvsagt å snakka med masse lokalt næringsliv som er opptekne av å slå nabokommunane våre med bidrag til aksjonen, fortel ho.

Inviterer til korgafest

Tv-aksjonen går føre seg på sundag, men i regi av Kvinnherad frivilligsentral, Kulturhuset Husnes, Flyktningtenesta og Vaksenopplæringa vert det skipa til internasjonal kulturfest allereie fyrstkomande fredag.

I festsalen på kulturhuset vert det servert mat og det er underhaldning på scena. Her er alle velkomne, men ein oppmodast til å ta med seg ein rett til matbordet.

– Eine året var det 32 ulike nasjonar representert på festen. Og sist gong var det 200 stykke som dansa bli-me dansen. Det er ein fantastisk oppleving med mat og underhaldning frå alle hjørne i verda. Det er heilt gratis, men vi set nokre bøsser der for dei som vil kan bidra, men målet er rett og slett berre å koma ilag, sa Veronica T. Thorsen.

– Det er eit heilt fantastisk engasjement når desse festane blir arrangert. Folk er stolte av å visa fram sin eigen kultur, og det er uhøgtidleg og inkluderande, la Anne Sofie Bjelland Kjeka til.

Aksjonskomiteen avslutta med å rosa alle dei frivillige som tek del i tv-aksjonen.

– Ofte er det dei same som går år etter år, vi må gje ros til både rodeleiarar, bøsseberarar og alle som gjer eit slag for tv-aksjonen, sa Thunold.

Vi har mange flinke frivillige i kommunen, det er vi stolte av, sa Enstad.