Vêråret 2017

Jepp, det er berre å slå fast; det vart mykje vêr i 2017 òg!

Januar var ganske våt.

Februar var temmeleg fin.

Mars var dobbelt så våt som året før.

I april kom vinteren tilbake.

Mai var vakker og mild.

Juni var ikkje mykje å skryta av.

Juli var mykje betre enn året før.

Også august var betre enn i 2016.

I september starta hausten brukbart.

Oktober var alt anna enn eventyrleg.

November gav lite sol og lite varme.

Desember regna vekk.

Det er den kjappe oppsummeringa av vêråret 2017. Eit år som baud på mykje meir nedbør enn forgjengaren. Aller mest på Opstveit i Matre, sjølvsagt. Det må seiast å vera på høgste merket med 4.140,9 millimeter regn. Spesielt når vi tenkjer at det tilsvarer meir enn fire meter nedbør på eit enkelt punkt.

Ølve og Omvikdalen forsvarte sine medaljeplassar på nedbørstoppen. Eik i Rosendal enda på 7. plass, men slo sin gamle rekord på 2.588,9 millimeter frå 1967. Hatlestrand leverer ikkje tal til Grenda sin vêrstatistikk, men Meteorologisk institutt opplyser at bygda fekk 3.058,9 millimeter, noko som er 57,2 mm meir enn deira rekord frå 2015.

 

Mot normalt

Mest beskjedne på regnoversikten er Vang i Rosendal og Uskedalen. Fyrstnemnde stoppa på 2.103,4 millimeter, altså berre om lag halvparten av Matre. I Austrepollen noterte Statkraft 2.961,9 mm.

– Det er jammen vått. Håpar vi får sommar i år, kommenterer Gunnar Onarheim.

På Husnes vart det registrert 2.827,6 millimeter i fjor. Normalen hjå Hydro, basert på siste 30 år, er 2.233,9. Med andre ord kan vi trygt slå fast at 2017 var «moooot normalt», som Leif Juster ville sagt det. Historias våtaste år på Husnes er 1967, då det kom 3.036,7 millimeter. Motsett rekord vart sett i 1987 med 1.505,2 mm.