Ventar sterke vindkast dei neste fira dagane

Dei neste fira dagane er det venta lokale vindkast kring 27-30 meter i sekundet frå søraust. Det startar tysdag i 14-tida, meldar Yr.no.

– Vestsida av Folgefonna, Rosendal, fjordstrøka i Sunnhordland og indre Sunnhordland, samt fjella i Sør-Norge vil merka dette godt, seier vakthavande meteorolog Geir Ottar Fagerlid ved Vêrvarslinga på Vestlandet til Bergens Tidende.

Yr.no oppmodar om å sikra lause gjenstandar og unngå unødvendig ferdsel på utsette stader. Dei skriv òg at det er mogleg at ferje, fly eller anna transport kan få kansellerte avgangar eller lengre reisetid.

Konsekvensar av vinden kan vera at straumforsyninga vert påverka dersom trer knekk eller kjem i kontakt med straumnettet. Enkelte vegar kan bli stengt grunna objekt i vegbana. Snøfokk i fjella kan resultera i kolonnekøyring eller stengte veger. Følg med på vegmeldingar, skriv dei.

Vinden skal løya på fredag i 13-tida.