Ventar med søknad om oppgradering på Valen Sjukehus
Styremøtet i Helse Fonna i går, onsdag, gjekk imot administrasjonen si innstilling om å søka eit internlån frå Helse Vest for å få fortgang i oppgraderinga av sikkerheitsposten ved Valen Sjukehus.
– Dette vert utsett til februar, kan kommunikasjonssjef i Helse Fonna, Magne Kydland fortelja på telefon.
Styret vil sjå ein ferdig rapport frå forprosjektet som alt er godt i gang, før arbeidet med søknaden kan starta.
Annonse
«(…) Administrasjonen vil kome tilbake til saka i februar, når forprosjektet er ferdig, og ein har meir presist kostnadsoverslag for ei fullstendig styrebehandling av saka», står det å lesa i møteprotokollen.
Møter ikkje lovkrav
Det har lenge vore klart at sikkerheitsposten ved Valen Sjukehus ikkje tilfredsstiller dagens lover og standard for god behandling og tryggleik for pasientar og tilsette. I innstillinga frå administrasjonen vart situasjonen skildra mellom anna slik:
«Dagens sikkerheitspost er prega av uhensiktsmessige løysingar knytt til areal, sikkerheitstiltak, bygningsmasse og uteområde. (…) Dagens bygningsmessige løysingar ivaretar heller ikkje lovkrav for institusjonar godkjent for tvungent psykisk helsevern.»
Annonse
Planane om lånesøknad og oppgradering er altså ikkje lagt vekk, men det vert ikkje utarbeidd noko søknad før i februar.
