Kommunedirektøren føreslo å fordela 250.000 i marknadsføringstilskot til reiselivsbransjen. Formannskapet treng imidlertid meir tid til å vurdera saka.
For å bøta på verknadane av koronaen, sette kommunen av 500.000 kroner i marknadsføringstilskot til reiselivsbransjen. I midten av mai delte formannskapet ut halve summen, nærare bestemt 150.000 kroner til Folgefonnsenteret/Turistinformasjonen og 100.000 til Visit Rosendal.
Annonse
Førre veke innstilte kommunedirektøren på å løyva resten, fordelt slik: 100.000 kroner til Husnes Vekst/Husnes Grendalag til profilering av Husnes som regionsenter, 50.000 til Sæbøvik Hamn for å fremja turistutviklinga på øya, 50.000 til Visit Rosendal til utvikling av pakkar med sikte på å utvida driftssesongen, og 50.000 til Uskedal Utvikling til oppgradering av nettsida uskedalen.no med nyare teknologi.
Hilde Enstad (Ap) føreslo å utsetja saka til 18. juni, slik at formannskapet fekk sett seg betre inn i sakene. Det var Hege Lægreid Røssland (SF) samd i.
– Søknadane ber preg av å vera skrivne i full fart, så kvaliteten på dei er veldig ulik, meinte ho.
I samanheng
Annonse
Også Leif Sverre Enes (H) tykte det var greitt med ei utsetjing, slik at ein kan vurdera midlane i samanheng med utfordringane knytt til toalett og parkering til dei store turistmengdene som er venta.
– Det er ikkje sikkert vi treng marknadsføra oss, kanskje vi heller må bruka pengane på å ta i mot dei som kjem, sa han.
Kommunedirektør Ragnhild Bjerkvik minna om at søknadsfristen var sett til 1. juni for at saka skulle kunna leggjast fram på torsdagens møte.
– Skal vi driva marknadsføring, så er det no ein gjer førebuingane til sommarsesongen. Men trass alt er det ikkje så lenge til 18. juni, og to veker bør ein vel tola, vurderte ho.
