– Ventar å vera i vanleg gjenge i løpet av eit par dagar

Fredag kveld hadde Hydro Husnes utrenning i støyperiet. Etter ei hektisk helg har aluminiumsverket no kontroll på produksjonen.

I løpet av helga måtte Hydro Husnes både etablera ein ny måte å støypa ut metallet sitt på, samtidig som ein raskast råd måtte reparera det eksisterande støyperiet.

– Me ventar å vera tilbake til normal produksjon i støyperiet i løpet av eit par dagar, seier fabrikksjef Jon Ola Ystgaard til Grenda.

Kontinuerleg produksjon

Som Grenda meldte om i helga, hadde Hydro Husnes ei utrenning i støyperiet fredag kveld.

– Det går bra no. Me hadde utrenning av metall i støypekummane. Dette høyrest dramatisk ut, men dette skjedde i utstyr som er laga for å handtera flytande metall. Konsekvensen var at me ikkje kunne støypa ut metallet vårt på vanleg måte, og me måtte etablerte ein ny måte å gjera det, forklarer Ystgaard.

Aluminiumsverket har ein kontinuerleg produksjon, kvar time av året.

– Det alvorlege for oss i denne samanhengen, er å ta unna mengda flytane metall som blir laga. Ein kan ikkje berre skru ned produksjonen, det er i så fall ein prosess som tar lang tid, er krevjande i seg sjølv, er dyr og som har langsiktige konsekvensar for verket, seier fabrikksjefen vidare.

I gang med boltar

Parallelt med reperasjon av skadane utrenninga førte til, måtte Hydro Husnes få på plass ein måte å støypa ut metallet som vart produsert i elektrolysen.

– Me har gjennom helga støypt det i tobbar, som enkelt sagt er store barrar på eit par tonn. No får me støypt ut det me har, med litt etterslep. Me byrja å støypa boltar att i sekstida søndag kveld, men med noko redusert kapasitet. Eg trur me er tilbake på vanleg kapasitet i løpet av eit par dagar, seier Ystgaard.

Hendinga vart varsla internt i 20-tida fredag kveld.

– Me mobiliserte det me trengte av ressursar, sjølv om det var ein fredag. Det er mange som har jobba mykje denne helga for å få oss opp

– Kva kan du seia om hendingsforløpet?

– Me har brukt kreftene våre på å få produksjonen opp att, men kjem til å gjera ei gransking seinare for å finna rotårsaka til utrenninga. Eg syns apparatet vårt har fungert veldig bra når dette skjedde. Me måtte mobilisera utanfor vanleg arbeidstid, og det har fungert imponerande. Folk stiller og gjer det som må gjerast når slik skjer, rosar Ystgaard.

Førebudde

Han understrekar at verket har ulike prosedyrar for ulike scenario, og at dette er eit scenario dei var førebudd på.

– No er det ingen situasjonar som er heilt like, men utrenning i støyperiet er ei kjent problemstilling i metallproduksjon. Det er ein kompleks operasjon å etablera ny måte å støypa på, samtidig som me skal reparera det øydelagde, men me har klart det på godt vis, sluttar Ystgaard.