Vellukka Valenseminar i hamn

Kring 90 deltakarar hadde funne vegen til konferansesalen til Rosendal Fjordhotel for seminaret «Helsetenesta i nytt lys».

– Me har god deltaking frå Helse Fonna, primærhelsetenesta og Kvinnherad kommune.

Forelesarane våre er også godt nøgde, og var veldig nøgde med preseminaret på Valen sjukehus på torsdag, samt omvisinga på garden, museet, gravplassen og Valekaien, fortel overlege Tone Henriksen i arrangørkomiteen.

Høgt nivå

Ho legg ikkje skjul på at ho meiner seminaret på mange måtar starta med høgdepunktet, som var professor Ole Didrik Blomberg, som hadde orde før Henriksen sjølv heldt sitt føredrag.

– Dei andre førelesarane er jo i realiteten dei fremste i verda innan dette faget. Både Klaus Martiny og John Gottlieb er på det høgaste nivået. Det er eit enormt program eigentleg, og dei har hatt ei fin oppleving her i Kvinnherad, fortel Henriksen.

Avdelingsleiar ved Valen sjukehus Marianne Lund Anderssen gledde seg veldig over

– Eg trur det er mange som har fått tankar og idear om korleis lys påverkar kvardagen vår. Det er krevjande å gripa med ein gong. Eg har sjølv følgt Tone i hennar arbeid, men må stadig vekk ta meg sjølv i å konstatera verdien i dette arbeidet. Dette er eigentleg sjølvsagte ting som blir sett i eit system, og då byrjar det å gå opp for mange kor viktig lyset er for oss, seier Lund Anderssen.

– Her er det mange sjukepleiarar som jobbar på døgnpostane, det er legar som jobbar i spesialiseringsløp, me har spesialistar her og blant anna tilreisande frå Oslo-psykiatrien. Det blir nokon ringar i vatnet som me ikkje heilt kunne føresjå i starten av planlegginga av seminaret, utfyller Henriksen.

Etterspurd informasjon

Lund Anderssen påpeikar også at mange byrjar å bli nyfikne på behandlingane med lys.

– Det har vore bekymringar knytt til biverknadane med psykofarmaka, og då blir kunnskapen som føredragshaldarane her deler ekstra interessant, seier avdelingsleiaren.

– Det er viktig for at denne kunnskapen blir tatt inn i bygginga nye sjukehusbygg. Alle data me har no går i retning av at det er ei stor førebyggande effekt i å konstruera rett, og at ein då kjem til å spara pengar på drift. Så ein må tenka langsiktig når ein skal bygga nytt, og det er viktig å gjera det rett frå starten, seier Henriksen om informasjonen som vart delt på seminaret.

Seminaret var det tredje Valenseminaret dei har arrangert.