Vellukka kapitalinnhenting for Fjelbergsambandet AS
Det krev kapital å jobba fram fastlandssamband for Fjelbergøyane. No har Fjelbergsambandet AS gjennomført ei vellukka auke i aksjekapital.
Publisert
Sist oppdatert
I ei pressemelding frå Fjelbergsambandet AS kjem det fram at selskapet nyleg hadde ekstraordinær generalforsamling for å utvida aksjekapitalen. Dette etter at Kvinnherad kommunestyre i siste møte løyvde 3,2 millionar kroner for å gjera selskapet i stand til å betala for utgiftene som er opparbeidd i samband med reguleringsplanen for bru- og vegsambandet til Fjelberg og Borgundøy.
1,2 millionar til
Annonse
Då generalforsamlinga vart halde vart det teikna ytterlegare aksjar for 1,2 million kroner. Denne kapitalen kom inn ved at Fjelberg Fjordbruk AS, som er ein del av Alsaker Fjordbruk- konsernet og som er aksjonær frå før, teikna seg for ein ny million i aksjekapital og ved at Leite Invest AS (selskap på Borgundøy eigd av Hans Helge Vik) teikna seg for 200.000 Kr. Slik er samla aksjekapital som selskapet har motteke no kome opp i ni millionar.
– Det er svært gledeleg at kommunen står på og løyver dei midlane som skal til for å få fram dette vegsambandet til avgjerd om gjennomføring som ferjeavløysingsprosjekt. Enno meir gledeleg er det at næringslivet i området på nytt viser støtte til sambandet og stiller opp med kapital for at dette sambandet skal bli bygd. Det er utruleg bra at me har slike gode støttespelarar, seier styreleiar Ove Lemicka i ei pressemelding i samband med den nyleg gjennomførte kapitalinnhentinga.
– No er selskapet i stand til å halda fram dette viktige arbeidet med å arbeida framover planane om bruer til øyane. Kommunestyret har òg vedteke at reguleringsplanen skal ha prioritet. Målsettinga er å vedta planen i løpet av hausten, sluttar Lemicka.
