– Veldig usamde i denne saka

Norwegian Pipeline Drilling avviser fleire av påstandane til kommunen. At det er lekkasjar i borehola, er dei derimot samde i, men meiner det ikkje er deira ansvar å tetta dei.

Magnus Birkeland, sivilingeniør og dagleg leiar i Norwegian Pipeline Drilling AS (NPD), er ikkje samd i Sigbjørn Øye, sektorleiar i Kvinnherad kommune, sin påstand om at borehola i Svartavatnet ikkje er plasserte i korrekt høgde.

– Det er direkte feil, seier han til Grenda.

Til påstanden om lekkasjar i borehola, svarar han slik:

– Punkt 1: Ja, det er lekkasjar. Punkt 2: Den aktuelle situasjonen var ikkje beskriven, og derfor verken planlagt eller prisa. Vidare arbeid vart utført i full forståing med kommunen.

Han brukar deretter prosessen kring bygging av eit bustadhus for å illustrera kva som har skjedd ved Svartavatnet.

– Ei kva som helst bygning står på ei tomt. Du som eigar må vita korleis tomta ser ut. Når du bestiller huset, må du opplysa om tomta og grunntilhøva, og så får du ein pris. Når arbeidet vert sett i gang, og det viser seg at det er fjell der, så må det sprengast. Viss du ikkje har opplyst om det, så påløper det ekstra kostnader, for då dreiar det seg om uføresette tilhøve som eigar skulle ha opplyst om, seier Birkeland.

Han understrekar at om entreprenøren hadde teke ei synfaring fyrst, så stiller saka seg annleis.

– Men denne kontrakten vart lyst ut og underskriven på vinteren. Då var det is og snø der oppe, og ingenting å sjå, legg Birkeland til.

 

Ikkje motsegner

NDP skulle bora eit 300 meter langt hol.

– I dei fyrste 270 metrane var fjellet som forventa. Så bora vi eitt hol til, og kom då til ei kløft i fjellet med lausmassar. Der var ikkje grunntilhøva som forventa, og det var ikkje mogleg å gjennomføra arbeidet som planlagt, seier sivilingeniøren.

NDP sendte så fakturaer til kommunen på ekstrakostnaden. Arbeidet stansa opp i oktober, men akkurat det var planlagd grunna vinteren som nærma seg.

– Vi sendte fyrst ein faktura og så ein til, og det kom ikkje motsegner frå kommunen på nokon av dei. Oppunder jul fekk vi plutseleg melding om at dei ikkje ville betala. Motsegnene kom med andre ord fyrst lenge etterpå, hevdar Magnus Birkeland, som fortel at prosjektet mellom anna kravde spesialbestilte deler frå utlandet.

 

Vår Herre

– Kva synest du om kommunen si framferd?

– På Vestlandet har ein vel tidlegare trudd mest på Vår Herre, medan ein no trur meir på konsulentar viss ein ikkje har ei oppfatning sjølv. Vår oppfatning er at det er Kvinnherad kommune sine konsulentar som ikkje har gjort jobben sin. Eg har aldri opplevd å heva ein kontrakt før, og det seier jo ein del.

– Kva vil de gjera no?

– Vi skal prøva å få til ein sluttfaktura, noko vi jobbar med no. Vi vil òg prøva å få til ein dialog med kommunen, men det har vore kommunikasjonsproblem så langt, for å seia det slik. Kommunen sin folk er kjekke og greie, men vi er veldig usamde i denne saka. Det er ein komplisert jobb som krev spesiell fagkunnskap. Dei er nok ikkje kjent med slike prosjekt, og det trur eg dei innser sjølve også, seier Magnus Birkeland.

At kommunen no vil overta prosjektet sjølv, tykkjer han er ein god idé.

– Vi kjem til å føreslå løysingar for å hjelpa dei, lovar Birkeland.