– Veldig nyttig Oslo-tur

Sunnhordlandsrådet hadde lagt opp til eit omfattande program i hovudstaden. Tysdag var programmet fylt med møte i Energidepartementet, Samferdselsdepartementet, Helse- og omsorgsdepartementet, Landbruks- og matdepartementet og Hordalandsbenken. Departementsmøta var fordelt mellom utsendingane frå dei åtte medlemskommunane i Sunnhordlandsrådet, medan alle deltok på møtet med Hordalandsbenken.

Hjå sistnemnde vart følgjande saker tatt opp: E39, E134, infrastruktur/kraftrapporten, refusjon for at brann og redning tar helseoppdrag, ressurskrevjande brukarar, undervisnings- og visningskonsesjonar innan havbruk, berekraftig produksjon, kompetansebehov i det grøne skiftet, nedbygging av NAV i distrikta og regional sentralisering, inntektssystemet, reiseliv og UNESCO Geopark Sunnhordland.

Makstak

Onsdag bestod menyen av møte med Justis- og beredskapsdepartement, Nærings- og fiskeridepartementet, Finansdepartementet og Arbeids- og inkluderingsdepartementet.

For Kvinnherad stilte varaordførar Thea Vaage og kommunedirektør Leif Ove Mikkelsen. Då Grenda snakka med Vaage onsdag føremiddag, var no nett ferdig med møtet hjå Finansdepartementet. Dagen før vitja ho Energidepartementet (som fjerna «Olje- og…» frå namnet sitt 1. januar).

– Eg snakka ein del om makstaket på eigedomsskatt for kraftverk, noko som er relevant både i Energidepartementet og i Finansdepartementet. I tillegg tok vi opp kraftunderskotet, og at det er for mange proppar i nettet. Det er eigentleg manglande kapasitet i nettet som gjer at vi får kraftunderskot, fortel ho.

Som nemnt vart visningskonsesjonar, som Salmon Eye er eit døme på, teke opp med Hordalandsbenken.

– Det er kome forslag om å ta bort desse konsesjonane. Vi har i staden sagt at vi ynskjer å behalda dei og meiner dei er viktige for oss, fortel Thea Vaage.

Nyttig tur

Ho opplever at politikarane og departementsfolka var lydhøyre for innspela frå Sunnhordland.

– Dei sa det var interessante problemstillingar, men vi får no sjå kva som skjer. Innspela vi kom med er til 2025-budsjettet, så kanskje noko vil koma med der. Uansett var det veldig kjekt og spennande å møta desse folka for fyrste gong, seier ho.

– Vil du seia det var ein nyttig tur?

– Ja, veldig, ikkje minst fordi eg no har blitt betre kjent med dei andre som sit i Sunnhordlandsrådet. Det er viktig å byggja relasjonar på tvers av kommunane, slår Vaage fast.

Både ho og Leif Ove Mikkelsen blir verande i Oslo, for torsdag ettermiddag skal begge delta på Hydro sin nyttårskonferanse.