Vel skote noregsmeisterskap
Då 3D-NM var vel gjennomført kunne Atle Helland, på vegne av Kvinnherad Bogeskyttarklubb, slå fast at dei såg seg nøgde med arrangementet.
Publisert
– Me arrangerte jo også NM i Tveitedalen for to år sidan, og då hadde me strålande sol. Så denne gongen vart det nok ikkje den same kosen, og me har måtta ta fleire omsyn til smittevern og slikt. Men me har fått skryt for arrangementet, og særleg Taisto Erkinharju, som har vore løypeansvarleg, har fått svært gode tilbakemeldingar, fortel Helland.
Sjølv rosar han dugnadsgjengen, som har stått på i kulissane frå halv sju på morgonen til langt utpå dag. Lene Medhaug hadde ansvar for kiosken ved ternebu, som verkeleg hadde NM-stemninga på plass, med både norske flagg, samt varmt og kaldt på disken.
Annonse
Lokka ut i regnet
Arrangementet var ope for publikum, men regnet førte mogleg til at det ikkje akkurat yra av skodelystne i løypene. Sunniva Holmedal Berentsen, Mathea Askeland og Håkon Askeland var blant dei lokale som hadde funne fram regnkleda.
Dei meinte det var spanande å følgja med på skytinga, og ikkje minst å sjå dei ulike 3D-figurane som vart nytta som mål.
– Det er jo spanande å sjå korleis det går, smilte Håkon. Som styremedlem i Ternen IL kunne han også minnast kor stas det var då kongepokalen vart delt ut i Tveitedalen under sist 3D-NM, sjølv om det ikkje var innan skisporten.
Annonse
Då nokre forbipasserande og godt polstra fjellfolk kom forbi i retning Dyrrindo og Ulvanosa, og undra kva som gjekk føre seg, kunne dei lokale publikummarane fortelja om både drakar og gremlins i skogen. Hadde dei ikkje før sagt det, måtte dei vidare for å sjå etter fleire figurar.
Sjølv om pil og bogesesongen no er på hell, har Atle Helland og Terje Bakke eit føreståande EM i Slovenia å gle seg til. Likeins er det eit innandørs NM som skal haldast i november. Arrangørklubben hevda seg iallfall godt i denne meisterskapen og kunne såleis ikkje forlanga meir, meinte Helland.
