Vedvarande stor belastning for tilsette ved Halsnøytunet

I eit brev til kommunen peikar ho mellom anna på at det i mai 2021 var eit sjukefråvær på 17 %.

– Dette er ikkje greitt, og ein bør kanskje gå i djupna for å finne årsaka til dette og ikkje berre handsame symptoma, skriv ho.

I meldinga kjem det fram at det er stor belastning og minimum bemanning ved Halsnøytunet. Det er dette som vert trekt fram som grunnen til det store sjukefråværet, og Vernetenesta vil halda eit skjerpa blikk på arbeidstilhøva ved Halsnøytunet framover. Dette fordi dei fryktar at dei tilsette seier opp stillingane sine, med dei følgjene at kommunen misser verdifull fagkompetanse. Dette vil kunne auke presset på dei tilsette som blir verande i jobben, noko som vert omtala som ein vond sirkel.

Ser ikkje betring

Sjølv om det er sett inn tiltak for å prøve å forbetre situasjonen for dei tilsette ved Halsnøytunet, har ikkje desse tiltaka ført til forbetring, ifølgje hovudverneombodet.

– Samstundes går dei på, med krum hals og legg hovuda i bløyt for å finne måtar dei kan rasjonalisere og effektivisere drifta på. Dei er lojale og gjer det dei får beskjed om, samstundes som arbeidsmengda aukar, står det vidare i uro-meldinga.

Det vert dernest understreka at sjukepleiarmangelen råkar Halsnøytunet sterkt, og det vert samstundes vist til at mangelen kan bli enno større i tida som kjem.

– Vernetenesta er kjend med at mange tilsette i alle yrkessjikt på Halsnøytunet no ser seg om etter anna arbeid.