Vedtok straumstøtte for næringslivet

I eit ekstraordinært møte vedtok formannskapet reglane for ei lokal straumstøtteordning i Kvinnherad.

Straumprisen har i store deler av året vore historisk høg, og dermed også krevjande for næringslivet å handtera. Attende i september vedtok derfor kommunestyret å setja av 7,5 millionar kroner til ei støtteordning.

Saka kom opp til handsaming i eit Teams-møte i formannskapet på onsdag. Kommunedirektøren la fram ei innstilling som i stor grad var basert på ei tilsvarande sak som Ullensvang kommune nyleg vedtok. Ein legg opp til at det skal vera lett å søkja.

– Eg er veldig nøgd med at vi får dette på plass, sa Hege Lægreid Røssland (SF).

Ho undra samstundes om ordninga også omfattar enkeltpersonføretak, noko næringssjef Grete Solheim stadfesta, så lenge firmaet har eige organisasjonsnummer.

Leif Sverre Enes (H) merka seg at ordninga baserer seg på straumrekningane for juli, august og september, og minna om at det såleis var tre månader att av året.

– Vi ser at prisane er på veg opp att. Eg berre spør om det er lurt å bruka heile potten no, sa han.

Kommunedirektør Ragnhild Bjerkvik rådde til å følgja innstillinga, både av praktiske og rekneskapsmessige årsaker.

– Kanskje vi kan setja av meir til neste år, om det vert naudsynt, følgde Gunnar Våge (Sp) opp, noko Leif Sverre Enes sa seg samd i.

Retningslinjer

Følgjande retningslinjer vart vedteke samrøystes:

* Støtta skal vera tilsvarande den statlege støtta som er etablert for landbruket. Støtta dekkjer 80% av kostnadene over 70 øre/kWh eks. mva. for straumforbruket i juli, august og september 2022.

* Grunnlaget er gjennomsnittleg spotpris i månaden.

* Stønaden vert utbetalt basert på rekningar for perioden juli - september 2022.

* Ordninga skal gjelda alle små og mellomstore verksemder. Små og mellomstore verksemder blir definert som verksemder med mindre enn 100 tilsette og mindre enn 100 millionar kr i årleg omsetning.

* Ordninga gjeld ikkje for offentlege verksemder.

* Ordninga gjeld ikkje for produsentar av kraft.

* Det vert gitt støtte for samla forbruk på inntil 200.000 kwh per verksemd for 3 månadar.

* Verksemda må stadfesta at dei ikkje er omfatta av ei statleg ordning.

* Verksemda må stadfesta at dei ikkje kjem over grensa for bagatellmessig støtte.

* Ordninga er tillitsbasert. Dei som misbruker ordninga må tilbakebetale støttebeløp med renter.

* Dersom det samla nivået på godkjente søknadssummar overstig ramma for ordninga, vert løyvingane avkorta prosentvis og likt for alle søkarar.