Vedtok å byggja ny Husnes-skule

Det var tendensar til hallelujastemning i kommunestyresalen då ny skule på Husnes vart vedtatt. Ei samla politikargruppe var veldig glade og stolte over at prosessen med nybygg ved sida av Kvinnherad Arena endeleg kan koma vidare.

– Skulen er femti år gamal og tida er overmoden for ein ny skule, konstaterte Synnøve Solbakken (Ap), som var første til å ta ordet då debatten opna.

Skjønt, debatt og debatt. Sjeldan har eit kommunestyre i Kvinnherad vore meir samstemt om ei utbygging enn denne torsdagen.

Halleluja

Silje Nordtveit Olsen (SF) påpeika at ho hadde same notatet som Solbakken.

– Det er viktig å byggja ein skule som er tilpassa den undervisinga ein skal gje i 2022, sa ho.

– Eg er valt av Høgre til å kommentera denne saka, truleg fordi eg er glad i hallelujastemning. Dette vil gje ei retning i korleis me vil ha skulane våre. Dette er eit vedtak og dette er der me byrjar, smilte Erling Niklasen.

Gunnar Våge (Sp) tilsvarande samd i bygging, og fortalte om telefonar frå nabobygder.

– No må dåke ikkje byggja så liten skule at det ikkje er plass til fleire elevar der, er beskjeden eg har fått, gjorde han merksam på.

Jostein Saghaug nytta høvet til å påpeika at MDG ynskjer at det blir bygd ein skule som har eit minimalt straumforbruk, og samtidig er tilrettelagt for dei med utfordringar, og eksemplifiserte med både rørslehemma, men også svaksynte og blinde.

– Gode skulebygg er viktige, men det viktigaste er gode læararar. Sluttar meg til resten av kommunestyret og gler meg over at Husnes får ny skule, seier Marit Årthun (KrF)

– Eg er veldig glad for at det er eit samstemt kommunestyre som vil byggja ny skule. Namn får ein koma tilbake til seinare. Dette er ikkje ein ny Undarheim skule, det er ein ny barneskule på Husnes, sa kommunedirektør Ragnhild Bjerkvik like før røystinga.

Innstillinga

I innstillinga frå kommunedirektøren heiter det:

• Det vert å byggja ny Husnes barneskule, som skal stå ferdig til skuleåret 24/25. Skulen skal plasserast på ferdigregulert tomt for formålet like ved Kvinnherad Arena på Husnes (alternativ 2 i utgreiinga).

• Forprosjekt med meir detaljert kostnadskalkyle, og plan for samla bruk av avsette midlar i økonomiplan til Oppvekstskårplan, skal leggjast fram for kommunestyret før kontraktsinngåing.

• Kostnad til forprosjekt skal implementerast i budsjett 2022, ved budsjettrevisjon etter kvartalsrapport 2. kvartal. Totalkostnad for prosjektet skal implementerast i økonomiplan 2023-2026.