Førre veke skipa nasjonalparkforvaltar Astrid Bakke Haavik til stibyggjarkurs. Her ser vi Øystein Wallevik, Rune Holen frå Miljødirektoratet, Tracy Kheder, Hans Olav Leganger, Kristian Helgesen, Merethe Offerdal Tveit og Sivert Eik Høivik i sving på stien til Malmangernuten.

– Vedlikehald er alfa og omega

Laurdag var siste dagen i stibyggjarkurset, og dei som meldte seg på har fått god lærdom om korleis ta vare på stiane i kommunen.

Marie-Louise Knoop
Journalist
Publisert

– Det viktigaste er å få kontroll på vatnet, fortel deltakar på kurset Øystein Wallevik.

Dette er noko av det Rune Holen frå Miljødirektoratet sitt felt-apparat «Statens naturoppsyn» har vore mest oppteken av i løpet av dei tre dagane kurset har vart.

– Det er viktig å fekk vatnet, slik at vi unngår erosjon i stien. Om stien er våt og gjørmete går folk gjerne utanom, og då blir ofte stien breiare og problemet berre spreier seg. Det er viktig å vøla stiane slik at dette ikkje skjer, fortel han.

Teamet har jobba hardt desse dagane, og eit godt stykke av stien i Svartedalen har blitt grusa og fin.
Her ser ein litt korleis stien såg ut før dei fekk grusa.
Teamet laga ein flott demning i stien av steinar dei fann på staden.
Det var vått arbeid med stien i Svartedalen, men det stoppa ikkje deltakarane på stibyggjarkurset.
No har vatnet ein plass å ta vegen, i staden for at det skal øydelegga stien.

Kunnskap og kompetanse

Holen er oppteken av at vi må ta vare på stiane vi har rundt om kring i Noreg, for å i det heile tatt kunna bruka dei.

– Tilsyn og vedlikehald er alfa og omega. Vi har auka trafikk i både fjell og andre stiar, og om ingen held ved like dei naturlege stiane kan det koma til å kosta dyrt, seier han.

I løpet av stibyggjarkurset har i alle fall seks stykke i Kvinnherad fått verdefull lærdom om vedlikehald og fiksing av stiar. Dei har også blitt oppmoda om å starta ein stikomité for å få til meir i kommunen.

Grenda møtte gjengen på veg opp til Malmangernuten, der dei var i gang med å laga ei trapp i stien.

– Vi tek steinane som ligg rundt her, som finnest naturleg i området. Då ser det meir harmonisk ut enn om vi skulle brukt til dømes slipt stein, seier Holen.

Han visar deltakarane korleis dei skal byggja opp trappa, med store steinar som trinn og små steinar under som kan støtta opp.

– Det er viktig å laga det til slik at ein får fleire måtar å «angripa» trappa på. Og vi lagar kun trapp på veldig bratte plassar, elles prøvar vi å laga til ein god sti med variasjon og ikkje minst naturlig «spalt» med steinar for å hindra at vatnet grev seg ned i stien, fortel Holen.

Oppryddningsarbeidet etterpå er lika viktig, og steinar som ligg laust i stien vert fjerna, og både trapp og sti vert jamna ut.

– Poenget er at det vi gjer skal gli inn i naturen, så å rydda opp etter seg er viktig, seier Holen.

Rune Holen frå Statens naturoppsyn finn ein stein i terrenget som kan bli eit flott trappetrinn og sender den ned til Hans Olav Leganger.
Holen viser Merethe Offerdal Tveit korleis ein kan støtta opp trinna med mindre steinar.

Føler på ein ansvar

Deltakarane har jobba hardt desse dagane, men er likevel med godt mot.

– Det har vore flotte dagar, og fantastisk lærerikt. Og så har vi fått god trim og hatt det sosialt og kjekt, fortel deltakar Tracy Kheder, som saman med mannen sin driv Destination Rosendal.

No ser ho stiane på ei heilt anna måte, og fortel at kurset absolutt har gitt meirsmak.

– Vi sender jo folk på tur og fortel dei kor dei kan gå, så eg føler eit ansvar for at det skal vera trygge og gode stiar, seier ho.

Det er ein flott trapp teamet har laga i terrenget, og den ser ut som den høyrer heime der,
Teamet; Hans Olav Leganger, Rune Holen, Kristian Helgesen, Tracy Kheder, Merethe Offerdal Tveit, Sivert Eik Høivik og Øystein Wallevik.
miljøvern rosendal natur og miljø nyhende kvinnherad
Powered by Labrador CMS