Våt avslutning på året

Heile fem av målestasjonane våre passerte 400 millimeter med nedbør i desember, noko som heldigvis er svært sjeldsynt. Tek vi med at ytterlegare tre hamna langt over 300 millimeter, så er det berre to igjen, og dei la seg på øvste halvdel av 200-talet.

Matre var attende på nedbørstoppen med sine 493,3 millimeter. Deretter kom Ølve, Uskedalen og Mauranger. Merk at Uskedalstala denne gong kjem frå oppe i dalen, og ikkje frå Korsneset. Vonleg er dette i normalt gjenge igjen neste gong.

Også i desember falt det minst nedbør på Halsnøy. Målaren på Sæbøvik registrerte «berre» 253,3 millimeter. Vang i Rosendal var den einaste andre staden som ikkje hamna over 300-grensa.

Nesten konstant

Samanlikna med året før kom desember dårleg ut. Det var ein våt månad også i 2023, men på langt nær av den dimensjon som no. Spesielt i Uskedalen var forskjellen stor, over 250 millimeter.

Det var fleire dagar med mykje nedbør. Underslagsmateriellet viser at det som var av finvêr kom til og med den 12. desember. Etterpå ausa det ned nesten konstant, før det roa seg på årets to siste dagar. Mauranger kan skryta av ti opplette døger, for resten av kommunen vart det éin-sifra.

– Desember vart den desidert våtaste månaden hjå meg, det var kriminelt. Fire dagar fekk rundt 50 millimeter med regn, fortel Henrik Barthel i Ølve.

Dei historiske tala frå Husnes fortel at desember 2004 er den våtaste med 453,9 millimeter. Tørraste utgåva kom i 1978 med 19,7 millimeter.

Norsk rekord

Temperaturen nådde opp i 13-14 grader på det varmaste. På det kaldaste sokk gradstokken til minus 3,9 i Mauranger.

Ekspertane hjå Meteorologisk institutt karakteriserer desember som mild og våt. Månaden enda 1,7 grader over normalen og var i gjennomsnitt 30 prosent våtare. Det vart også 15 stasjonsrekordar for maksimumstemperatur, inkludert éin norgesrekord.

– At det vart sett ny, norsk varmerekord i desember er i eit klimaperspektiv det viktigaste som hendte denne månaden. Ser vi derimot heile landet under eitt, utmerka ikkje desember seg så veldig, seier klimaforskar Jostein Mamen i ei pressemelding.

Den nye rekorden lyder på 18,7 grader, og vart sett i Tafjord den 1. desember.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Tore Bondhus), Rosendal - Eik (Jan Eik), Rosendal - Vang (Kvinnherad Elektro), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. desember:

20249,19

20239,52

20229,12

20218,71

20209,39

20198,81

20189,11

20178,64

20168,7

20158,9

201410,3

20138,2

Kjelde: Kurt Haugland, Uskedalen