Vart inspirert av bygdeutviklingsarbeidet på Hatlestrand

– Det var fyrst og fremst utruleg kjekt å koma til Hatlestrand og orientera seg litt. Den gjengen har jo verkeleg tatt eigarskap til bygdeutviklinga, og eg blir inspirert av korleis dei jobbar, til dømes med desse «kom heim»-breva som dei har sendt ut, fortel Vegard Bjørnevik.

Med «gjengen» meiner han foreininga Hatlestrand og Ølve Bygdeutvikling. Dei har satsa aktivt på å få fleire tilflyttarar til bygdene sine, med gode resultat. Leiar for denne foreininga, Olve Vangdal, møtte kommuneleiinga då dei kom på besøk, og var også til stades då utvalet Plan, Teknikk og Miljø hadde den same synfaringa i september.

Dialog med BKK

Representantane for Hatlestrand vil at kommunen skal gå i forhandlingar for å kjøpa BKK-tomta i Bolandsvågen. Området har blitt omtala som inngangspartiet til bygda, og dei lokale kreftene ynskjer at bygda og kommunen kan utvikla Bolandsvågen saman.

Bjørnevik kan ikkje lova noko i denne omgang, men opplyser at kommunedirektøren har fått mynde til å forhandla med BKK, innanfor visse økonomiske rammer.

– Me er jo alt i ein dialog med BKK om eigedomsporteføljen deira. Det kan vera fornuftig å sikra oss området i Bolandsvågen, det har eit fantastisk potensiale. Men det trengs ein plan, og det kjem sjølvsagt an på prisen, seier Bjørnevik.

Dette er altså i utgangspunktet delegert til kommuneadministrasjonen, men dersom prisen vert høg, må eit eventuelt kjøp handsamast også politisk.

Midlar til bustadutvikling

Etter ein stopp på BKK-tomta i Bolandsvågen, gjekk turen vidare til byggjefeltet Stegane, der Ole Femsteinevik og O. Jacobsen Trelast AS har fått utarbeidd reguleringsplan for ei utviding av byggjefeltet. Også her vil bygdeutviklarane ha kommunen med på laget. Femsteinevik vil mellom anna at kommunen bidreg til å få lagt vatn og avløp under vegen, og at vegen bør asfalterast.

Olve Vangdal har tidlegare lagt fram ulike måtar kommunen kan bidra til at bustadfeltet kan realiserast. Eitt alternativ som vart nemnt var at kommunen kjøper tomtearealet, for så å selja tilbake seksjonar til O. Jacobsen Trelast. Ein annan metode kan vera at kommunen tek deler av kostnadane og avtaler kjøp av kommunale bustader.

– Me har jo midlar til bustadutvikling ståande, frå budsjettet i fjor, men me må ta heile kommunen inn i biletet når desse midlane skal brukast. Administrasjonen vil invitera næringa til ei drøfting for å få innspel til korleis bustadutviklinga i Kvinnherad kan stimulerast på best måte, seier Bjørnevik.

Sjå til Hatlestrand og Ølve

Bjørnevik tok også turen innom helsesenteret på Hatlestrand. Her har det kome meldingar om dårleg personvern på venterommet.

– Det var greitt å kunne stikka innom og helsa på der inne. Så gjenstår det å sjå om dette er noko me kan gjera noko med, fortel ordføraren.

Strand-Ulv-hallen fekk også ordførarbesøk torsdag. Her vart Bjørnevik imponert.

– Det er eit imponerande bygg, der alt blir drive på dugnad!

Ordføraren kan altså ikkje lova innbyggjarane på Hatlestrand nokon konkrete vedtak på ståande fot, men har iallfall blitt klokare etter eit besøk i bygda.

– Andre bygder bør sjå til Hatlestrand og Ølve når det gjeld bygdeutvikling. Her er det ein veldig god organisasjonskultur, seier Vegard Bjørnevik.