Vart høyrt – får pengar i budsjettet

Grenda har ved fleire høve skrive om dei lite eigna venteroms-fasilitetane på Hatlestrand helsesenter. Fyrste gong i mai då vi intervjua sjukepleiar Annike Nistad og lokalpolitikar Per Svindland (Frp). Sistnemnde tok saka opp igjen i Kommunestyret 31. oktober, og fekk då svar frå kommunedirektøren om at dei har merka seg behovet, og at det kanskje er eit tilbygg som må til.

Per Svindland hadde allereie på eige initiativ forhøyrt seg med firmaet Måge & Nistad Bygg om kva ei utbygging vil kosta, og fått attende eit estimat på 1.350.000 kroner.

I budsjettet som Kommunestyret vedtok på torsdag, er det løyvd 2 millionar kroner i 2025 til helsesenteret på Hatlestrand.

– Det er eit viktig tiltak, og eg vil berømma representanten Svindland frå Frp som har drege opp denne saka i Kommunestyret, og det er ei sak vi vil følgja opp, sa Per Harald Havnen Löfgren Johansen (Ap).