Vart bisett i Høvik kirke
Torsdag vart Kåre Arvid Hesvik, som vart drepen under skytinga i Oslo, bisett frå Høvik kirke utanfor Oslo.
Publisert
Kåre Arvid Hesvik vart født 18. februar 1962, og var opphavleg frå Mauranger. Han døydde i Oslo 25. juni i år, 60 år gamal, då han vart dødeleg såra under masseskytinga natta før Pride-markeringa.
«Å elske er en menneskerett - Ingen er fri før alle er fri. Vi i familien ønsker å takke for all støtte og omtanke i denne svært krevende tiden. Vi setter umåtelig stor pris på hver og en av dere, men ber om forståelse for at vi ikke klarer å svare dere alle», står det på minnesida hjå Jølstad begravelsesbyrå.
Annonse
Regjeringa representert
Bisetjinga skjedde i ei fullsett Høvik kirke torsdag 7. juli. Der var regjeringa representert ved utanriksminister Anniken Huitfeldt.
– Då Kåre vart riven frå oss handla det om eit angrep på nokre avgjerande verdiar. Eit inkluderande fellesskap som betyr at vi verdset det at vi er forskjellige. Vi veit at Kåre vart drepen medan han var ute og hygga seg ei sommarnatt. Mange var ute for å feira Pride, veka for kjærleik, mangfald og fridom. Så kom skota som skremte ein heil nasjon, og særleg det skeive miljøet, sa statsråden i ei minnetale, referert av VG.no.
Seremonien i Høvik kirke var fyrst og fremst eit personleg farvel for familie og vener.
