Vårt ansvar som folkevalde, òg i krevjande tider!

Kvinnherad kommune er eit stort oppgåvefellesskap. Formannskapsmodellen dannar grunnlag for korleis me organiserer oss både politisk og elles i styringa av vår kommune.

I dette oppgåvefellesskapet, er det mange ulike roller. Kommunestyret og dei politiske utvala handsamar mange prinsipielle og overordna saker. Samstundes gjev kommunestyret mynde til kommunedirektøren i å treffa beslutningar innan ei stor breidde av andre saker. Kommunedirektøren og sektorleiarar har samstundes det overbyggjande driftsansvaret, som skal sikra at alle oppgåver og tenester blir løyst på ein tilfredsstillande og god måte.

Som ordførar får eg ei rekke henvendingar som omhandlar mange ulike saker. Førre onsdag fekk eg melding frå ein innbyggjar og tilsett i kommunen, om skildringar og opplevingar innan omsorgstenesta vår. Avsendar fekk svar same kvelden, om at denne saka vil eg sjå på umiddelbart.

Allereie neste dag var det møte i kommunestyret. Innhaldet og skildringane gjorde meg sterkt uroleg, og difor formidla eg til kommunestyret at formannskapet kom til å bli kalla inn til eit ekstraordinært møte denne veka.

Som ordførar for alle, vil eg vera tydeleg på at me som folkevalde har eit ansvar gitt av lova i å ivareta og sikra ei verdig og god eldreomsorg i Kvinnherad. Dette dannar grunnlag for prioriteringar og samhandling i oppgåvefellesskapet vårt.

Eg er heilt overtydd om at formannskapet får god informasjon, og ikkje minst blir gitt moglegheit i å få god kunnskap om dei skildringane som er gitt i meldinga og for situasjonen totalt sett i eldreomsorga.

Eg er like overtydd om, og vil frå mi side signalisera, at dette blir tatt på det høgste alvor. Difor har eg lagt stor vekt på handling i denne saka.

Eg ser fram til at dei folkevalde trer saman på torsdag, og set ei tydeleg retning.

 

Kvinnherad 23.02.2021

Hans Inge Myrvold

Ordførar