Varslar om helikopteraktivitet i samband med trappeforlenging
Laurdag blir det helikopterflyging ved Malmangernuten i inntil 5-6 timar. Stein skal løftast på plass for at sherpaar skal kunna jobba med trappeprosjekt.
Publisert
Sist oppdatert
– Sherpaane skal forlengja trappa mellom Høyklepp og Hjort, med 140 meter på toppen og 50 i botn av den eksisterande «Sherpatrappa» på veg opp til Malmangernuten. Helikopteraktiviteten på laurdag er naudsynt for å flytta stein som skal nyttast til å byggja trappene frå andre stadar i fjellsida, forklarer leiar av turgruppa i Rosendal Turnlag Morten Nygård.
Stenger stien på dagen
Annonse
Sherpaane kom til Rosendal på søndag, og starta på arbeidet sitt måndag morgon.
– Som i dei andre prosjekta med sherpaane er det berre lokal stein me nyttar i trappebygginga. Dei har brukt denne veka til å rekognosera og samla stein. Dei skal vera ferdige med det heile i løpet av ein trevekers periode, opplyser Nygård.
Som følgje av arbeidet denne laurdagen, er stien opp frå Skeie stengt denne dagen.
Viss nokon har tenkt seg til Malmangernuten, så må dei gå opp frå Murabotn eller Guddal. Planen er å byrja i ti-tida. Sherpaane har funne fram stein, og fått dei i store sekkar, såkalla bigbags, som helikopteret skal løfta inn til førehandsbestemte plassar i traseen.
Annonse
Fjerde prosjektet
Dette er eit prosjekt som turgruppa i RT gjennomfører.
– Ideen er tre år gamal, då me såg at den noverande trappa hadde glidd utruleg godt inn i terrenget, og at vegetasjonen var komen tilbake langs trappene. Men i over- og underkant av trappene såg me at det var store sår i naturen, djupe trakk og parallelle stiar. Derfor såg me at det var behov for å gjera meir i bratthenget, utdjupar turgruppeleiaren.
– Me satsar på at dette vil gjera susen, og med dette arbeidet tenkjer me at me har gjort det me skal gjera av denne typen prosjekt, legg han til om det som er det fjerde av slike prosjekt i deira regi.
For dei med hang til detaljkunnskap om folk og land, kan det nemnast at to av fire sherpaar er frå byen Khunde, høgt oppe i Nepal, og dei er altså av sherpafolket. Dei to andre er Magar-folk, og kjem frå området rundt flyplassen Lukla, som er den ein flyr inn til når ein skal til Mount Everest. Skal ein vera pirkete, noko somme vel å vera, så kan dei to sistnemnde eigentleg ikkje kallast sherpaar. Det kjem ikkje til å endra på namnet til steinbyggverket, som for alltid vil vera sherpatrappene.
