Varslar om betydeleg fare for sørpeskred i Kvinnherad
Statsforvaltaren hadde søndag møte med alle kommunane i Vestland fylke i samband med vêret som er venta dei komande dagane. Også i Kvinnherad vert det no meldt om stor skredfare.
Publisert
Søndag oppdaterte NVE farekarta sine for Vestland. Spesielt vart skredfaren i fylket oppgradert.
«Vêrendringa som er venta dei komande dagane vil by på både store mengder nedbør, temperaturendringar og vind. Kombinasjonen aukar faren for skred, og spesielt for sørpeskred», skriv Kvinnherad kommune i ei pressemelding.
Annonse
Då Statsforvaltaren kalla Vestland-kommunane inn til operativt samordningsmøte søndag formiddag, varsla Meteorologisk institutt følgjande utvikling:
* Temperaturauke med mykje nedbør i løpet av måndag.
* Kaldare vêr på tysdag, med mykje nedbør (som snø over 1000 meter).
* Varmare vêr igjen på onsdag.
Annonse
Årsaka til desse vêrfenomena er varme luftmassar som kjem inn frå sør og vest.
Stiga veldig fort
Norges vassdrags- og energidirektorat (NVE) har oppgradert til oransje farevarsel for snøskred i Kvinnherad frå måndag av. Nordlege og nordvestlege delar av Vestland har raudt farevarsel.
– Det kjem til å samla seg mykje vatn i snøen som vi har no, og så kjem det til å bli metta og sleppa. Vi ventar at det kjem ned sørpeskred, og at dette kjem til å utvikla seg utover måndag ettermiddag og tysdag, opplyser NVE i pressemeldinga.
Flaumvarselet er grønt, men NVE meiner ein bør ta høgde for at mindre vassdrag kan stiga veldig fort.
– Det kjem eit gult varsel på flaum i løpet av søndagen, men somme vassdrag vil oppleva at det burde vore oransje. Det er eit veldig usikkert varsel vi kjem med no, utdjupar NVE.
Annonse
Hjelpa smeltevatnet
Statens vegvesen har gjort førebuande arbeid på stikkrenner og i grøfter, og som Kvinnherad kommune oppmoda om på fredag, er det lurt å hjelpa smeltevatnet med å finna ein stad å gjera av seg.
