Varsla sjølv om sterk bekymring

Tove Omdal, einingsleiar ved Halsnøytunet, varsla om sterke bekymringar allereie før ein tilsett sendte eit lengre varsel til ordføraren.

Tove Omdal var til stades i rådhuset på torsdag og fortalde sin versjon av stoda ved Halsnøytunet. Institusjonen Halsnøytunet består av to bufellesskap, demensavdeling, heimeteneste, og ei avdeling med korttids- og langtidsplassar.

– Kvinnherad kommune har dyktige tilsette på Halsnøytunet. Dei er løysingsorienterte og dei er gode på samarbeid. Eg kan ikkje få fullrost nok dei som jobbar der, og eg er stolt over å få vera leiaren deira. Dei tilsette ser kvar og ein. Vi får gode tilbakemeldingar frå bebuarar og pårørande om at Halsnøytunet er ein god plass å vera, sa ho.

I 2020 var det 102 avvik i fyrste kvartal på Halsnøytunet. I 2019 var det 81 avvik i same periode.

– At vi får inn avvik viser at vi har eit system som dei tilsette brukar. Alvorsgraden er det dei tilsette sjølve som rangerer i varselet, opplyste ho.

Tove Omdal var tydeleg på at budsjettet er svært trongt.

– Eg har tru på at vi kan få til noko. Og om vi hadde fått jobba med ei og ei avdeling, og ikkje tatt ned alt på ein gong, har eg tru på at vi kunne fått ein betre prosess. Men eg har store vanskar med å sjå at vi skal klara den bemanningsnorma budsjettvedtaket legg opp til, meinte ho.

Gjentaking

På Halsnøytunet skal dei ta ned ein tidlegvakt på korttid/langtidsavdelinga, tilsvarande 7,5 timar, og til saman tre seinvakter. Noko som utgjer 19 timar per dag. I desember vart bemanninga i heimetenesta redusert med sju timar fire dagar i veka, til saman 28 timar.

– Eg har sjølv varsla om ei sterk bekymring over situasjonen vi har stått i når vi har teke ned bemanninga, då vi ikkje klarar å førebyggje gjentaking av hendingar utan at vi opprettheld bemanninga. Dette gjorde eg før dette varselet kom i avisene, forklarte ho.

Ho fortalde også om slitne tilsette for tida, og hadde ei klar oppmoding:

– Vi må stoppa opp og sjå på budsjettreduksjonen på nytt.

Omdal fekk med seg nokre gode ord på vegen.

– All ros til Tove for oppfølging av personalet. Ho har alltid open dør, takka Vigdis Jensen, tillitsvalt i Fagforbundet.