Varaldsøy sanitetslag inviterer til basar: - Dette blir fantastisk kjekt

6. august kan du delta på basar i Grendahuset på Varaldsøy, i regi av Varaldsøy sanitetslag.

– Gunnar Våge skal vera konferansier, og det vil bli sal av både årar, kaffi og kaker, så dette blir fantastisk kjekt. Det er i tillegg kome inn mange kjekke gevinstar frå kjente og ukjente, men også frå lokale butikkar. Mange av gevinstane er frå forskjellege butikkar i Rosendal, dei har vore særs snille, skryt Ingunn Enæs Gjuvsland, som er leiar i Varaldsøy sanitetslag.

Pengane som kjem inn går til utskifting av taket på Heimly - hjartesaken til sanitetslaget.

– Det er taket på Heimly me strevar for, så alt av pengar me får inn går sjølvsagt til dette. Og forresten, ferja er jo blitt gratis no, så det er få unnskyldningar å nytta seg av for å ikkje koma på basaren vår, ler ho.

Kor mykje ventar dykk å få inn?

– Då me hadde nettbasar førre året, under pandemien, fekk me inn rundt tjue tusen. På gode år har me fått inn heile førti tusen, så denne gongen håpar me på rundt tretti kanskje. Det hadde vore flott, smiler Ingunn før ho humrar med seg sjølv og legg til.

– Om me ikkje får inn nok pengar på basaren bør bankfolka skjelva litt i buksene.

Ingunn (71): – Eg trur kanskje me må rana ein bank

Vil sikra vidare drift

Det eksisterande taket på Heimly er gamalt, flatt og har lekkasje. Det er difor heilt naudsynt å reparere taket for å halda bygget i brukbar stand.

– Nytt tak vil få tilstrekkeleg fall og vil sikra vidare drift ved heimen.

Mellom anna nyttar heimetenesta i kommunen staden som base, og Stendi, landets største private omsorgsaktør, leiger deler av huset til si drift. Frivillige lag nyttar Heimly som møtestad, og lokala er også nytta av små firma med base og aktivitet på øya.