Varaldsøy i sjokk: - Det er ufatteleg. Eg forstår ikkje noko av det

Innbyggjarane til Varaldsøy er i sjokk etter den tragiske hendinga torsdag kveld.

Ein mann i 40-åra er pågripen og sikta for drap etter at ei kvinne vart funnen død på Varaldsøy torsdag kveld. Ei tragisk hending som pregar innbyggjarane i øysamfunnet.

- Det er veldig overraskande. Og så på ein så liten plass som det her. Hadde det vore Chicago så kunne ein skjønt det, seier Håkon Tangerås.

Han er nærmaste nabo av Ungdomshuset på Varaldsøy, kor kommunen no har oppretta krisesenter for dei pårørande.

– Det er heilt ufatteleg. Eg er sjølv vaksen opp her på øya, og her har det aldri vore noko kriminelt. Det er kjekke folk alle som bur her. Eg forstår ikkje noko av det, seier Tangerås.

Lensmann Sigurd Børve i Kvinnherad lensmannsdistrikt skal koma til Varaldsøy og orientera nærmare i løpet av dagen.

Grenda kjem tilbake med meir etter det.