Var på synfaring i gamlebanken
Både ordførar, kommunedirektør og kommuneoverlege har vore og inspisert dei gamle lokala til Kvinnherad Sparebank i Rosendal. Samstundes er det sett ned ei arbeidsgruppe.
Publisert
Sist oppdatert
I budsjettvedtaket i desember opna fleirtalspartia for å leiga lokale til helsesentertenester i Rosendal. I eit av verbalpunkta ber dei om at kommunedirektøren fremjar ei sak for Kommunestyret. «Kommunedirektøren får fullmakt til å gå så raskt som mogleg i gang med utgreiinga og kontakta moglege samarbeidspartnarar», står det. Saka skal leggjast fram for politikarane allereie innan utgangen av mars 2025.
Eit av alternativa er dei tidlegare lokala til Kvinnherad Sparebank. Fredag 20. desember var ordførar Vegard Bjørnevik, kommunedirektør Leif Ove Mikkelsen og kommuneoverlege Glenn A. Opland på synfaring der.
Annonse
Ut på anbod
I tillegg er det sett ned ei arbeidsgruppa beståande av Opland, lege Trygve Torjusen, hovudverneombod Gunhild Kvåle, helsesjukepleiar Gunn Heidi Eikemo Steine, jordmor Irene Haavik, einingsleiar barn og familie Randi Pedersen og einingsleiar bygg og eigedom Knut Bjørgvik.
– No skal vi gå gjennom verbalpunktet og sjå kva som ligg i det. Så skal vi vurdera korleis vi skal gå vidare med saka. Leige av lokale må truleg ut på anbod. Vi må dessutan sjå om det er eigna for legesenter og helsestasjon, og vurdera om det også kan høva til apotek og fylkestannklinikk, fortel Glenn A. Opland til Grenda.
