Vann internasjonal trommepris

«Drumeo» er verdas største trommelæringsplattform, og kan skilta med over 7 millionar følgjarar på den populære appen Instagram. Kvart år deler dei ut pris til dei beste trommeslagarane i ulike kategoriar, blant anna beste metal-trommeslagar», rocke-trommeslagar, pop-trommeslagar og Mauricio sin kategori, beste Instagram-trommeslagar.

Vanskeleg å tru

Dei andre nominerte i dei ulike kategoriane består av fleire av verdas beste og mest kjende trommeslagarar frå ei rekkje kjende band. Det er i dette selskapet Mauricio no er på god veg inn i.

– På førehand hadde eg ganske låge forventingar til å faktisk vinna og eg trudde eigentleg ikkje at eg hadde nokon sjanse fordi dei andre som var nominerte hadde så mange fleire følgjarar enn meg. I tillegg så er eg ganske ny på Instagram også, fortel ein strålande nøgd vinnar.

– Eg fekk faktisk veta at eg vann for to veker sidan, men har då måtte halda det hemmeleg fram til no. Det var berre kona mi som fekk veta noko. Det var vanskeleg å halda seg, men det var sjølvsagt veldig kjekt å vinna, ler han.

Vidare fortel han at det også var eit sjokk å bli nominert i det heile.

– Drumeo la ut postar på Instagram der dei ba om nominasjonar til dei ulike kategoriane, då eg såg at mitt namn vart nemnd om att og om att av så mange folk, så byrja eg å tenkja. Kjem eg verkeleg til å bli nominert? Det var vanskeleg å tru på, men det syner seg at eg har ekstremt engasjerte følgjarar, konkluderer han.

Spanande mogelegheiter

Det som starta som ein liten hobby har no etter kvart ført med seg fleire spanande tilbod og mogelegheiter.

– Gjennom videoane mine så har eg blitt kjend med fleire av mine favorittrommeslagarar, som til dømes trommeslagaren i det brasilianske bandet Sepultura, som også er mitt favorittband. Det var også dei som fekk meg til å ville byrja med trommer i utgangspunktet då eg berre var 10-11 år gamal, fortel Weimar.

– No har eg og trommisen deifrå blitt vener og snakkar relativt ofte saman. Eg har også blitt kjent med andre trommeslagarar frå andre favorittband, som til dømes Enslaved. I tillegg til å få tilbod om å bli med backstage på Beyond the Gates(ein metalfestival i Bergen, journ.merk.) og som instruktør på ein italiensk trommecamp. Det er veldig gøy, fortset han.

Trass i at hobbyen no har ført med seg mange spanande tilbod og mogelegheiter, så er Mauricio likevel klinkande klar på éin ting. Livet hans er i Rosendal og på kulturskulen.

– Det at eg har fått såpass mange følgjarar og popularitet på internett, er mykje på grunn av at me bur her i Norge og eg har tilgang til studioet mitt heime. Hadde me budd i Brasil hadde det ikkje gått i det heile tatt, forklarer han.

– Eg er gift og har ei lita jente på to år, og me har det veldig bra her. Det er travelt, men det er også ei veldig god tid i livet. Me trivs kjempegodt her me er, og har ingen planar om å endra på nokon ting, fastslår han til slutt.