Vann halvmaraton i helga
Martha Teigen Varanes kom på 1.plass då det 21,2 kilometer lange Hardangervidda Marathon gjekk av stabelen laurdag.
Publisert
Sist oppdatert
Laurdag var det duka for Dynafit Hardangervidda Marathon i Eidfjord. Det var både full og halv distanse på programmet denne dagen. Martha Teigen Varanes var ei av dei som stod på startstreken på Høel, klar for halvmaraton. Løpet strakk seg over 21,2 kilometer, og 920 høgdemeter.
– Det var beinhardt. Eg har jo sprunge fleire lengre løp før, men dette er annleis. Her må ein gi bånn gass frå start, seier Varanes.
Annonse
Løpet ligg i fjellterreng, og er ei variert og teknisk krevjande løype. Etter 2 timer, 26 minutt og 25 sekund kryssa Martha målstreken ved Liseth, og tok dermed 1.plassen.
– Det var ein del motbakkar, og det er ikkje mi sterkaste side. Eg er best i nedoverbakke, så det var der eg tok igjen ho eg ofte såg ryggen på, fastslår Varanes, og held fram:
– Eg hadde ikkje høge forventningar, og trudde aldri eg kom til å vinne. Det var difor veldig uventa, men kjempe kjekt å ta fyrste plassen.
