Vann First Lego League i Kvinnherad: Skibuddies skal til Mo i Rana

Skibuddies, som gjengen hadde kalla sitt prosjekt, leverte ein presentasjon til dommarane som var i ekstase over. Det resulterte i vinnarpokal innan «Prosjektprisen», som vog tungt i totalsamandraget når vinnaren skulle kårast i Kvinnherad Arena denne laurdagen.

Alle dei 16 deltakarlaga deltok med både prosjektpresentasjon, teknologidel og stand, i tillegg til konkurransen med legorobotane. Skibuddies vann føre Masterhorse (Valen skule) og Egg & Bacon (Skarveland skule). Det er Newtonrommet som var arrangør av First Lego League i Kvinnherad Arena.

Forbetra

For vinnarlaget hadde Celine Apeland leiinga på teknologi, Ebba Hermann-Fossli leia gruppa som styrte med innovasjon og Ingrid Opedal Hass hadde gruppa som hadde orden på kjerneverdiar og stand

– Veldig gøy! Me har jobba 4-5 timar i veka med dette i åtte veker, i tillegg til ekstratid om me ville bruka det. Me har delt oss litt, og fokusert på våre delar, seier Celine og Ingrid.

1. desember reiser gjengen nordover til Mo i Rana, og den skandinavisk finalen går geografisk sett meir eller mindre midt i Norge 2. desember.

– No skal me jobba vidare og forbetra det me allereie har gjort. Me skal finpussa konseptet vårt, seier dei.

Ebba må truleg stå over turen til Mo i Rana, då ho har booka seg skal til USA i eit bryllaup akkurat den helga.

– Eg er jo gruppeleiar på innovasjon, så eg ville ønskt å vore med til Mo i Rana. Det utruleg at me vinn etter å ha jobba så mykje for det, og då er det ekstra surt å ikkje få med meg finalen, meiner Ebba.

– Eg trur dei skal klara seg utan meg. Det er mange av dei som er gode på dette, smiler Ebba.

Presentasjon

Dagen i Kvinnherad Arena starta allereie i åttetida for elevane, med opprigging av standar og testing av banane for legorobotane. Av standane var kanskje Mastergjengen frå Omvikdalen skule som hadde den mest publikumsvenlege standen. Dei stilte med eigenlaga traktorsimulator, noko som gav alle som ville ein sjanse til å endeleg testa traktorkøyring.

Fire lag med dommarar var sett i sving for å vurdera presentasjonane til dei ulike laga. Det var sett av ein halvtime til kvart prosjekt, og vurderingane var grundige.

Tord Saghaug Solberg frå Hydro Husnes, rektor ved Sunde skule Sindre Nyborg og varaordførar Thea Vaage var eitt av laga, og skulle gjennom fire av dei 16 laga i løpet av dagen.

Oppgåva i år var å få andre interesserte ein hobby som mange i klassen var interesserte i.

– Me har sett på volleyball, matlaging og no skal me snart få inn ei gruppe som har gardsdrift som prosjekt, forklarte dommarane til Grenda tidlegare på dagen.

Dei tykte det var vanskeleg å vurdera kor dei skulle leggja lista, då det var både 6. og 9. klassingar i sving.

– Det er første gongen me har vore dommarar også, så me er ikkje heilt sikre på alt. Dei har jobba med dette i åtte veker, så kor strenge kan me vera? sa Thea, Tord og Sindre før dei splitta vurderinga si inn i bitar som prosjekt, teknologi og kjerneverdiar, for å nemna nokre.

Legorace

Totalresultatet i dei ulike delar av konkurransen var det som gav totaltvinnaren, men det mest underhaldande i Kvinnherad Arena denne laurdagen, var robotkonkurransen. Alle dei 16 laga hadde bygd eigne legorobotar, som vart programmerte av elevane til å løysa ulike oppgåver på eit brett.

Oppgåvene var gitt på førehand, og er like som dei resten av landet tevla i. På to minutt og 30 sekund skulle robotane løysa oppgåver, og dommarane noterte poeng under vegs.

Programmeringa hadde elevane gjort i vekene fram mot konkurransen, og det resulterte i mykje høg puls, nervøs neglebiting og jubelbrøl i vakkert samspel. I dei innleiiande rundane fekk alle laga testa robotane sin tre gonger, og tok med seg sin beste poengsum inn i rangeringa som enda i kvartfinalistane.

Det er rikeleg med stødige programmerarar under utvikling i Kvinnherad, noko mellom anna dommar og IT-gründer Stig Atle Sunde gjekk god for frå scenen, og dette vart underbygd av god poengplukking av legorobotane.

Egg & Bacon

– 320 poeng er det meste ein kan få. Me fekk 290 på første forsøket vårt, sa ei ekstatisk Inga Rusten Saghaug tidleg på dagen.

Ho var med på Egg & Bacon, Skarveland skule sitt prosjekt, og dei heldt fram med å plukka med seg oppgåver og poeng gjennom heile robottevlinga.

– Me har jobba i åtte veker, nesten kvar einaste dag. To dagar i veka har gått til koding, og i tillegg minst to timar dei andre dagane til koding. Ein dag i veka har me også koda etter skulen. Me har satsa litt på dette, seier Inga og Luna Gravdal til Grenda etter at tredje innleiande robotrunde var ferdig.

Der plukka dei med seg 295 poeng.

– Litt slitsamt og litt stressande når roboten ikkje gjer det han skal, meiner dei.

Ettersom dei hadde mest poeng i innleiande rundar og tok seg heilt til finalen, er det grenser for kor mykje roboten kan ha plaga dei denne laurdagen.

Finalen vart gjort opp med to kampar, og der totalsummen avgjorde. Etter første kampen stod det 250-245 mellom Skarveland-elevane og 8. og 9. klasse frå Hatlestrand skule. I andre kampen heva begge laga seg til nye høgder. Hatlestrand skule landa på 275, men det var ikkje nok, for Skarveland skule leverte dagens beste runde då det gjaldt som mest, med 300 poeng og finalesiger.

At det vart grenselaus jubel etter sigeren, er kanskje å påpeika det openberre, men Egg & Bacon jubla både etter sigeren var eit faktum og då dei kom fram på scenen for å henta pokalen.

Sjølve robotkampane utgjorde 20 prosent i totalvurderinga, og bidrog godt til at Skarveland-gjengen kom på tredje plass totalt.