Valetrio inviterer til haustutstilling

– Me er tre damer på Valen som no går saman for å visa fram kva me driv med, seier Eva Handeland Sjo, Gerd Flattun Lilleeng og Marit Elisetbet Totland i ei pressemelding.

Damene har valt å ha haustutstillinga si på bygdehuset på Valen, og bileta som vert utstilt har stor spennvidda i uttrykk og motiv. Laurdag 22. oktober inviterer dei til opning, og utstillinga er også mogleg å vitja søndag 23. oktober.

Ein pause i kvardagen

I pressemeldinga står det følgjande om kunstnarane:

Eva Handeland Sjo teiknar portrett av dyr og menneske, med gråblyant og fargeblyant. Ho er sjølvlært og tok blyanten fatt så seint som i jula 2020.

Gerd Flattun Lilleeng har teikna sidan ho var lita. Etter at ho vart pensjonist har ho ein dag i veka gått på Bryggen kunstskule. Ho nyttar seg mest av pastell og kol.

Marit Elisebet Totland er også sjølvlært og lagar akrylmåleri med symbol og abstrakte uttrykk i tillegg til figurative motiv.

Felles for kunstnarane er gleda over å kunne uttrykka seg gjennom form og farge, og dei inviterer no til ei utstilling som dei håpar kan gi ein pause i kvardagsjaget.